Hindu-te'n Dussehra an lâwm

Khawvel leh ram chhung hmun dangte rualin Mizoramah pawh Hindute'n an kûtpui (puja) Dussehra chu hlim takin an hmang. Dussehra hi ni nga chhung lawm a ni ṭhin a, Mizorama an hmanna pui ber Hindustan Club, Babutlangah chuan Hindu sakhaw betute kal khawmin, intihhlimna chi hrang hrang an buatsaih.

Nimin khan Hindu-te pathian lim chu an sakhaw serh leh sâng chham pualin Tlawng luiah paih a ni. Tun hma chuan Hindu pathian lim lian tak tak an siam a, tlereuh cheimawina tinreng nen luiah an paih ṭhin a; mahse, chu'ng chuan lui a tihbawlh­hlawh ṭhin avangin kum 2010 aṭang chuan pathian lim tê zawk an siam ta a ni.

Nimin chhun leh zan khan Hindu sakhua zuitute chu khawvel zawng zawnga remna leh muanna a thlen theihna tur leh, an thil tihsual tawh zawng zawngte ngaihdam a nih theihna atan an ṭawngṭai a ni. Hindustan Club president Sajit Day chuan, Mizoramah kum 115 chhung Dussehra an hmang tawh tih a sawi a, "Zalen taka he hun kan hman ṭhin avangin Mizo mipuite hnenah lawmthu kan sawi a ni," a ti.