FCSCA-in gas harsat chhan an sawifiah Thla 9 chhungin gas bûr 9,50,208 hmuh a ni

Food, Civil Supplies & Consumer Affairs (FCSCA) department chuan, January - September 2019 chhungin Mizoramin Indian Oil Corporation (IOC) aṭanga gas domestic cylinder a dawn zat chu 9,50,208 a ni a, chawhrualin thla tin cylinder 1,05,579 dawng ang a nih thu an tarlang a, "Eirawngbawlna gas (LPG) chungchanga harsatna chi hrang hrang awm theite sukiang turin hma an la mek zel a ni," an ti.

Nimina FCSCA department thuchhuah tarlan danin, kumin January-September chhungin Mizoramin IOC aṭangin LPG domestic cylinder 9,50,208 a hmu a, thla tin bûr 1,05,579 dawng ang a ni chu nikum aiin a tam zawk. Kum 2018 January-September thla chhungah chuan domestic gas bûr 9,17,061 hmuh a ni a, chu chu chawhrualin thla tin bûr 1,01,896 dawng ziah ang a ni. Gas hmuh zat tarlanah hian RGGLV hnuai aṭanga hmuh chhiar tel a ni lo.

Supply department chuan, "Heta ṭanga lang chiang em em chu, Mualkhang bula lei tawlhin kumin July, August leh September thla chhung supply a tikhaihlak chung pawhin, nikum 2018 (Jan-Sept) ai chuan kumin 2019 (Jan-Sept) chhunga LPG supply kan hmuh a tam zawk daih, tih hi a ni," an ti.

FCSCA chuan, October thla chawhma lam chu India ram hmun tam zawkah Hindu kûtpui Dussehra leh Durga puja hman hun lai a ni tih sawiin, "LPG bottling plant-a thawk tam zawk chawlh rûnpui lai a ni ṭhin. Mizoramin LPG kan châwk luhna Borkhola Bottling Plant, Silchar, Assam leh Mualkhang, Mizoram pawh a nghawng ṭhin," an ti a; puja laiin state dangin gas an mamawhna a sàn avangin Mizoramin gas a hmuh a kiam phah 

ṭhin nia hriat a nih thu an tarlang.

Mualkhang Bottling Plant chu ni khata metric ton 100 pe chhuak ṭhin a nih laiin, himna lama endiknaah Petroleum & Safety Organization (PESO) duhthusam a nih loh avangin ni khata a pek chhuah theih zat tihtlemsak a ni tih sawiin FCSCA chuan, "Heti chung hian a tam thei ang ber min pe chhuak reng a ni. A pumpui thua kan LPG dawn a nghawng mek bawk," an ti.

Department tarlan danin, Mizoram chhung­ah IOC-in regular category leh RGGLV category hnuaiah LPG distributor 57 leh active customer 2,92,139 an nei mek. IOC inkaih­hruaina angin, active customer awm zatin LPG cylinder an dawn tur aṭanga chhûta 70% tal thla tin IOC-in a pe ngei tur a nih laiin, tun dinhmunah 40% pawh an pe chhuak thei lo.

IOC-in a pek tur zat a pek loh chhan chinfel chu IOC mawhphurhna a nih deuh ber thu sawiin Supply department chuan, "Mizoram sor­kara FCSCA chuan IOC hi ṭan la turin theihpatawpin a nawr reng a. Tun hnaia Union Home minister Amit Shah lo zin pawh kha hrilh a ni a, hma la tura ngenna leh hriattirna lehkha Chief Minister-in a pe a, chak taka bawhzui nghal a ni," an ti.

FCSCA department chuan, gas-a harsatna Mizoramin a tawhte an hria a, a sutkian dan tur ngaihtuahin vawi tam tak meeting neih a ni tawh tih sawiin, "Tun hnaiah pawh a changtu minister hoin gas harsatna kum tin maia awm ṭhin sutkian nan IOC chauh ni lo, Hindustan Petroleum Corp. Ltd, Bharat Petroleum Corp. Ltd (BPCL)-te pawh an rawn luh theih nan ruahmanna siam a ni," an ti a; Mualkhang Gas Bottling Plant mai ni lo, bottling plant lian zawk rél kawng ànah neih tuma hmalak a nih thu an sawi.

S    October thlaa Hindu kûtpui Dussehra leh Durga puja vang. Puja laiin gas hmuh a tlahniam a, puja zawhah hmuh tam leh beisei a ni.

S    Mualkhang Gas Bottling Plant-in ni khata gas a pek chhuah theih chin chu himna thil avangin tihniam a ni.

S    IOC-in gas a pek chhuah tur zat a pe chhuak lo.

S    Gas-te chu bottling plant aṭangin IOC hnuaia phurtu (transporter)-te'n an thiar ṭhin. Tuna LPG phurh man a hniam hle a, chu chuan Mizorama LPG phurh luh kawngah harsatna tam tak a siam mek. Chingfel turin FCSCA department-in thâ thlah loin hma a la mek zel.