Citizenship Amendment Bill/Act chungchangah Synod-in PM hnenah lehkha an thawn tawh

Mizoram Presby­te­rian Kohhran chuan an inkhawm­pui lian ber, Synod In­khawmpui ro­rel­naah Citizenship Amend­ment Bill/Act an duh loh thu an tihchian hnuah, kawng hrang hrangin hma an la tawh a; India prime minister Narendra Modi hnenah pawh lehkha an thawn nghal.

Tarlan tawh angin, Mizoram Synod hian nikuma Synod Inkhawm­puia ro an relnaah, De­cember 7 (Inrinni) khan CAB chungchang an ngaihtuah a; CAB chu an duh loh avangin a hlawhtlin lohna tura hma­lak dan tur an rêl nghal.

CAB duh lohna lantir dan tura Synod Inkhawmpui chuan thil chi li an ruahman a; chu'ngte chu - (i) CAB a hlawhtlin lohna tura kohhran mite ṭawngṭai rual te, (ii) CAB duh lohna thuziak tàr leh press release siam te, (iii) India Prime Minister hnenah CAB duh loh thu lehkha thawn leh, (iv) Mizoram Synod ngaihdan chu India rama state governor zawng zawng hnena hriattirte a ni.

Mizoram Synod chuan hmalakna tura an ruahmante chu Mission Veng Kohhran biak-ina inkhawmpui an neih lai la lain an bawhzui nghal vek a ni. CAB duh loh thu an pass ni, December 7, 2019-ah prime minister Narendra Modi hnena thleng turin Synod moderator Rev. R Lalchangliana hmingin lehkha an thawn nghal a, chu chu a copy India ram state tina governor zawng zawng hnenah pek tura tih a ni bawk.

Synod Inkhawmpui neih lai tho, December 8, 2019 chhun lamah press release an siam nghal a; December 8 vek, zan inkhawmah ṭawng­ṭai rualna hun an hmang nghal bawk. Ṭawngṭai rual hi Synod Inkhawmpui bakah, tualchhung kohhran tinah neih a ni. Mizoram Synod-in Prime Minister hnena lehkha an thawnah chuan, CAB chu Mizoram Presbyterian Kohhranin an duh loh tak zet thu te, CAB chu Mizoram leh a chhunga cheng Mizo mipuite tana dan ṭha lo taka an ngaih thute an tarlang.

PM Narendra Modi hnenah Mizoram Synod lehkha thawnah hian, Mizoram Presbyterian Church chu Mizoram mipui 6,12,804 awmna, tualchhung kohhran 1,234 telna leh Mizoram leh India ram hmun hrang hranga inzár pharh a nih thu an tarlang a; chutih rual­in, PM Narendra Modi leh a kaihhruai sorkar chu dik tak leh hleih nei loa ro an rel theih nan hriselna, finna leh chakna nei tura an duhsak thu an tarlang bawk.

Prime Minister hnena lehkha an thawn chung­changah hian chhàn lêtna emaw, sawifiahna emaw dawn an nei lo tih, Synod senior executive secretary Rev. Lianhmingthanga Sailo chuan Vanglaini palai zawhna chhángin a sawi.

Rev. Lianhming­thanga Sailo chuan, CAB/CAA leh PM Narendra Modi hnena lehkha an thawn chungchang hi an la ngaihtuah zui lo a, hmalak zui dan turah pawh ruahmanna a la awm lo tih a sawi a ni.