MSU-in aikal late zawn chhuah an rêl
Mizo Students' Union (MSU) chuan October 8, Thawhlehni zan khan Bairabi-ah General Conference vawi 18-na an hmang a, minister of state Robert Romawia Royte-in a hmanpui. MSU hian, zirtirtu aikal late zawn chhuah a, hrem an nih theih nana hmalak an rêl.
Robert Romawia chuan, ramri leh hnam thilah Mizo tawh phawt chu political party-a nihna dahṭhaa ṭan rual a pawimawh thu a sawi a; hriatna leh thiamna chu thil tih theihna a ni tih hriaa inzir zel tura zirlaite fuihin, "Retheih leh hausak hi finna azir a ni," a ti.
MSU conference hi nimin khan chhunzawm niin, Bairabi community hall-ah rorel inkhawm neih a ni a, president Vanlalliana Khiangte-in a kaihruai. Rorelnaah hian MSU hruaitu te, hnam pual zirlai pawl hruaitute leh college students' union hruaitu mi 105 an tel a ni.
MSU General Conference-ah hian palai 1,000 chuang an kal a, nizan khan School Education minister Lalchhandama Ralte-in a hmanpui a ni.
MSU rorel Ṭhenkhatte
I. Sorkar kaihhnawih
1. Mizoram Youth Commission grand-in-aid a awm reng hi budget head hran siamsak a nih theih nan MSU-in hma la rawh se.
2. Sorkar school tinah physical instructor mumal taka dah vek a nih theih nan MSU-in hma la rawh se.
3. Mizoram ramriah border checkpost changtlung kan neih theih nan leh border-a duty tur Mizo hlang awmna battalion thar din a nih theih nan MSU-in hma la rawh se.
4. Mizoram chhimthlang lam Mizo awmna khuate hi Zo fate chenna tlaka sorkarin a enkawl theih nan MSU-in hma la rawh se.
II. Zirna kaihhnawih
1. Zirtirtu aikal late zawn chhuah leh hrem an nih theih nan MSU-in hma la rawh se.
2. Zirna in hrang hrangah hnam làm leh zai inzirtirna hun mumal tak siam a nih theih nan MSU-in hma la rawh se.
3. College hrang hrangte'n zirlai admission fee aṭanga revenue an chhûn ṭhin tihtawp a nih theih nan leh college development fund atan hman a nih theih nan MSU-in hma la rawh se.
4. Computer base online central entrance leh competitive exam centre changtlung zawk kan neih theih nan MSU-in hma la rawh se.