Health Care Scheme-ah thu dik loa mi hruai sual tumah Dr Thangtea puh

Congress party chuan, MSHCS sum báwmpui (corpus fund)-a sum chu duh duha hman theih a ni lo a, a pung hmangin Mi­zo­ram sorkarin HCS a kal­pui ta zawk tih an sawi a, "Kum 2011 aṭanga a pung leh medical reimbursement bâng inkhâwl khâwm a tam zel a, tunah phei chuan HCS lian zawka kalpuina tham a lo ni ta a, natna hrang hrang pawh kum 2011-a bul ṭan a nih lai aiin a cover tam thei daih tawh zawk a ni," an ti.

MPCC chuan, Congress ministry-in awmze neia sum an enkawl azarah HCS ṭha leh lian zawka kalpui theitu, a zár zotu chu Dr R Lalthangliana a nih thu sawiin, tuna Health Minister chu Congress ministry kal ta chunga lawmthu sawi tur zawk a nih thu an sawi.

Hemi rual hian MPCC chuan MNF sorkar hmasak laia thil thleng chungchang tarlangin, HCS chu April 1, 2008-ah bul ṭan a ni a, a tìrah chéng vbc. 50 dah a nih thu an sawi a, "Khatih laia Health minister Pu Tlanga fanute hminga Bajaj Allianz-a pawisa dah a nih lai khan damlo medical bill thehlutte'n harsatna an tâwk nasa a, kum 2010-11 chhunga bill táng chu bill thehluh zawng zawng zinga 35% a tling a ni," an ti (http://www.iesd.org.in/jesd/Journal%20pdf/2015-XI 1%20James%20L.%20T.%20Thanga.pdf).

MPCC tarlan danin, HCS enkawl turin Mizoram State Health Society din a ni a, chutah chuan Chief Mi­nister chu chairman a ni. HCS sum zinga cheng nuai 1,000 chu Health minister R­ Tlang­hming­thanga fate hming­in Bajaj Allianz-ah Fortune Plus policy hnuaiah dah a ni.