World Mental Health Day hman a ni
Volunteers for Community Mental Health (VOLCOMH) buatsaihin nimin khan Synod Conference Centre-ah World Mental Health Day hman a ni a, MJA General Headquarters president Zonunsanga Khiangte-in a hmanpui. Inkhawmah hian, kuminah mahni intihlum Mizoramah mi 35 an awm tawh thu tarlan a ni.
Inkhawm hi VOLCOMH secretary H Ngurthansanga'n a kaihruai a; Zonunsanga Khiangte chuan, Pathian hnaih chu rilru hrisel neihna a nih thu sawiin, "Nun beidawngte'n beiseina thar an neih theih nan mithiamte'n social media hmang ṭangkai se a duhawm hle," a ti a; ruihhlo leh a kaihhnawih laka fihlim turin zirlai kal khawmte a chah.
MJA President chuan, Pathian leh a kohhrante hmalakna nen chak taka hna thawh theih a nih a beisei thu sawiin, "MJA aṭang pawhin mahni intihhlum venna kawngah hmalak a ni. Mahni intihlumte chanchin news-a chhuah lo tura kan inngen angin, chanchinbu leh television lamah pawh mahni intihlum chungchang kan chhuah ngai tawh lo," a ti.
Inkhawmah hian intihhlumna hmanrua khuahkhirh a ṭul thu te, media lama intihhlumna chhungchang fimkhur taka ziah a ṭul thu te, beiseina siam thei zawnga chanchin pek chhuah a pawimawh thu te, nun thiam zirna lam uar a ṭul thute leh, a hma thei ang bera intihhlum tumte hmuh chhuah leh puih chu a ven dan kawng pawimawh tak nih thute tarlan a ni.
Inkhawma tarlan danin, World Health Organisation (WHO)-in a chhût dan chuan, second 40 tinah mahni intihlum pakhat awm zel ang a ni a, kum tin mi nuai 8 dáwn mahni intihlum an awm ṭhin. Mahni intihhlum hi WHO Mental Health Action Plan 2013-2020 chuan 10%-a tihhniam a tum a, UN Sustainable Development Goals 2030 pawhin hmun thuma ṭhena hmun khatin tihkiam a tum bawk. Kumina World Mental Health Day thupui chu 'Rilru hriselna chawisan leh mahni intihhlum venna' tih a ni.