World Sight Day-ah free eye clinic

Nimin, October 10 kha World Sight Day vawi 20-na a ni a, he ni pual hian Dinthar Local Council leh Eye Care Community & Research Centre chuan nimin khan Dinthar Veng YMA Hall-ah a thlawna inentirna, Free Eye Clinic an huaihawt.

World Sight Day lawmna Free Eye Clinic-ah hian eye specialist pahnih - Dr KL Remsanga leh Dr C Lalduhkimite leh an thawhpuite'n mit lama harsatna neite an en a, mi 150 vel an inentir a ni. World Sight Day hi kum 2000 khan World Health Organization (WHO) chuan khawvela mitdel leh khaw hmuh fiah lote tihtlem nan a ruahman a, kum tin October thla Ningani vawi hnihnaah hman ṭhin a ni. Kumina World Sight Day thupui chu 'Vision first' tih a ni.

Free eye clinic buat­saihtu Eye Care Centre hi August 1, 1999-a din niin, kumin hi a kum 20-na a ni a; eye specialist doctor pali leh thawktu dang 13 an awm mek. Mizoram sorkar nen an inthlun zawm a, AB-PMJAY (golden card) leh Mizo­ram State Health Care Scheme hmanga inenkawl theihna hmun a ni bawk.