Hmun hrang hrangah RTI Week hman a ni

Nimin khan Serchhip, Mamit leh Hnahthialahte Right to Information (RTI) Week hman a ni a, Nilaini khan Kolasib-ah hman a ni bawk. Chief information com­missioner (CIC) Lal­duhsaka Ralte-in nimin khan Hnahthialah a hmanpui. RTI Week hi October 5-12 chhung awh a ni a, October 7 khan Aizawlah hawn a ni.

Hnahthial College auditorium-a RTI Week hmannaah CIC Lalduh­thlana Ralte chuan, mipui rorelna sorkar (democracy) leh RTI chu thil kal kawp tlat a ni tih sawiin, "Sorkar hmalakna leh hnathawhte hriat hi khua leh tuite chanvo a ni," a ti a; RTI Act chu dan ropui tak a nih thu leh sorkar khalh ngilna hmanrua a nih thu a sawi. 

Lalduhthlana Ralte chuan, RTI Act chu state dangte aiin Mizoramah an hman tlem thu sawiin, "He dan hi mipui zingah inhrilhfiah chhunzawm zel a ṭul tak zet a, a ṭangkai tur anga mipuite'n an chhawr thiam theih nan inzirtirna chak taka kalpui chhoh zel a ṭul a ni," a ti a; Mizo mipuite chu RTI Act hmanga zawhna zâwt hreh lo turin a chah.

Hnahthiala RTI Week hmanna hi Hnahthial DC Vanlalmawia'n a kaihruai a, Hnahthiala tlawmngai pawl leh khawtlang hruaitu te, Hnahthial MJA member-te leh zirlaite an tel. Hawnna inkhawm zawhah 'Workshop on RTI Act, 2005' neih nghal a ni.

Nimin vek khan Serchhip DC Conference Hall-ah RTI Week hman a ni a, district bawrhsap Sangchhin Chinzah khuallian a ni. Bawrhsap chuan, RTI Act chu mipui hman ṭangkai tur a nih thu a sawi rualin, sorkar hnathawkte pawhin mipui hriat tur chi thil pawimawhte chu RTI Act hmanga zawh kher ngai loa puanzar zel chu an tih tur a nih thu a sawi.

RTI Week hmanna inkhawm hi Serchhipa IPRO K Saitluanga'n a kaihruai a, Serchhip SDC pahnih - Samuel Zodinsanga leh Denny Lalchhuanawma ten RTI Act awmzia, a pawimawhna leh hman dante an sawifiah a ni.

Mamitah pawh nimin khan IPR Conference Hall-ah RTI Week hman a ni a, district bawrhsap Dr Lalrozama'n a hmanpui. Dr Lalrozama chuan, RTI Act chu an hmang ṭangkai em tih mahni inzawt turin kal khawmte a chah a, "Sawrkar official-te leh khawtlang hruaitute'n kan hna tur ṭheuhte ṭha takin thawk ila, harsatna kan tâwk lo ang. RTI Act hi langtlang sorkar siam tura duan a ni," a ti.

Inkhawm hi Mamita IPRO Paul Rokima'n a kaihruai a, Mamit College-a assistant professor Dr Joseph C Lalremruata'n RTI Act a sawifiah. Mamita SPIO, SAPIO leh dealing assistant-te leh tlawmngai pawl hrang hrang aiawhte an tel a ni.

Nimin vek khan Khawzawlah pawh RTI Week hman a ni a, information commissioner Dr C Lalzirliana'n a hmanpui. Dr C Lalzirliana chuan, RTI Act chu mipui tana duan a nih thu sawiin, sorkar ṭha leh langtlang siamtu a nih avangin hmang ṭangkai turin mipui a chah. Inkhawm hi Khawzawl DC H Lianzela'n a kaihruai a, SP Lalchunglura'n 'RTI leh mipuite' tih thupui a sawi.

RTI Week hi October 8, Nilaini khan Kolasib IPRO Conference Hall-ah pawh hman a lo ni tawh a, district bawrhsap Zoengsanga khuallian niin, YMA, MHIP leh MUP-a Kolasib sub-headquarters hruaitute leh MJA member-te an tel. Zoengsanga chuan, mipuiin sorkara hriat duh an neihte chhànna pek chu sorkar hnathawkte mawhphurhna a nih thu sawiin, "RTI Act hmanga zawhna a awm reng rengin, danin a phût ang ngeiin a hun takah chhànna pek tur a ni a, chhanna pek khawtlai a rem lo," a ti.

RTI Act, 2005 hi Gazette of India-ah June 21, 2005-ah chhuah a ni a, October 12, 2005-ah ram pumah hman ṭan a ni. Mizoram sorkar chuan kum 2006-ah a hmang ṭan a, June 29, 2006-ah Mizoram Information Commission (MIC) din a ni.

Mizoram Information Commission hotute sawi danin, Mizorama RTI Act hman ṭan kum 2006 aṭanga September 31, 2019 thleng khan Mizoramah RTI application 16,139 a lut tawh. Zualko vawi khatna (first appeal) 177, zualko vawi hnihna (second appeal) 73 leh MIC-a complaint lut 133 a awm tawh bawk.