Mizorama high school hmasa ber Mizo H/S platinum jubilee lawm a ni

Mizorama high school hmasa ber, Mizo High School chuan nimin khan Mizo H/S Field-ah an din champha vawi 75-na, platinum jubilee an lawm a, Home minister Lalchamliana leh School Education minister Lalchhan­dama Ralte ten an hmanpui.

Jubilee lawm inkhawm hi headmaster Lalthanzama'n a kaihruai a; minister Lalchamliana chuan, lehkhathiamna chu sorkar hna thawh nan chauha hmang lo a, mi dangte hna thawh tur siamsak theitu atana hmang turin zirlaite a fuih a, "Hlawhtlin nan taimakna leh thawhrim baka pawimawh a awm lo. Sikul kal lai aṭanga nun uluk leh ngaihsan tur dik tak ngaihsan a pawimawh," a ti.

Lalchamliana chuan, mi tinin mahni hmazawn ṭheuhah tih theih tâwk an neih thu sawiin, "Mi ram angin Zoram hi awm se, hranghluite'n an lo tih vangin nunna tam tak chán an awm tih i hre thar leh ang u," a ti a; ram leh hnam tana chhenfâkawm ni turin a chah.

Minister of state Lalchhan­dama Ralte pawhin thu sawiin, "Kan ram mamawh ber pakhat chu zirna lama harh tharna a ni. Zirna pawimawhna hi tun aia nasa zawkin lian se, ram siamna hnukpui a nih avangin ngaih pawimawh leh zual ni se. Zirlai nih laiin hnam rilru pua zir zel a pawimawh. Rual ú zawkte sûlhnu chhuiin, zirnaah ṭhahnemngaia sorkar laipuiah Zo fate a tam thei ang ber kan luh a ṭul," a ti.

Inkhawmah hian jubilee lawmna Organising secretary Lalnunpuia Hrahsel chuan thil pawimawh leh ṭul hrang hrang a tarlang a, Celebration & Publicity Committee chairman Lalrinkima kaihhruaiin sikula thawk tawh zinga thi tawhte sûnna hun hman a ni. Chawhnu lamah intihhlimna hun hman a ni a, tlaiah jubilee ruai ṭheh a ni.

Mizo High School hi Zosap missionary-te'n February 25, 1944-ah an din a, Rev. JM Lloyd chu headmaster hmasa ber niin, kum nga chhung hlawh nei loin a thawk a ni.