Assam NRC avangin harsatna lian tham kan tâwk lo - DGP

Mizoram director general of police (DGP) SBK Singh chuan, Assam-in National Registration of Citizen (NRC) final list an tihchhuah avangin Mizoramin harsatna lian tham a tawh phah loh thu a sawi.

Vanglaini palai zawhna chhangin DGP chuan, Assam NRC list-a chuang lote Mizoramah an lo luh lohna turin theihtawp an chhuah thu a sawi a, "NRC list-a chuang lo chu Inner Line Permit (ILP) pek chhuah phal a nih loh bakah, checkgate hrang hrangah NRC list-a chuang lo Mizorama luh tum an awm leh awm loh uluk taka endik a ni," a ti.

SBK Singh chuan, checkgate awm lohna Mizorama luh theihnaahte pawh police-te'n patrolling an neih ṭhin thu sawiin, "NRC list-a chuang lo Mizorama luh tum kan hmuh fuhte chu an rawn kalna lamah thawn kîr leh an ni ṭhin," a ti a; NRC list-a chuang lo Mizoram luh tum mi eng emaw zat an hnawh kîr tawh thu a sawi.

Ramri bakah, bazar leh pui­puinna hmunahte NRC list-a chuang lo an awm leh awm loh enfiah ṭhin a nih thu sawiin DGP chuan, "Kan naute hnenah khawtlang hruaitute nena ṭangho a, NRC list-a chuang leh chuang lo an awm leh awm loh enfiah turin kan ti. Tun dinhmunah chuan Assam NRC avangin harsatna lian tham kan tâwk lo," a ti.