KHAWTHLIR

Mizoram sorkar chuan thlasik a nih dawn avang­in October 14, 2019 aṭangin sorkar pisa kai hun a titawi dawn a, kumin October 14 aṭanga February 14, 2020 thlengin pisa kai hun chu zing dar 9 aṭanga tlai dar 4 a ni ang. Hei hi Mizoram bakah, hmarchhak state-a Mizoram House-ahte pawh hman tur a ni a; New Delhi, Kolkata, Mumbai leh Bengaluru-a Mizoram House pisa kai hun chu zing dar 9.30 aṭanga tlai dar 5 a ni ang.

Aizawl Traffic SP Rodingliana Chawngthu chuan thupek chhuahin, Chawlhhmun Presbyterian Kohhranin Aizawl West-II Presbytery inkhawmpui an thlen dawn avangin, October 10-13 chhung Chawlh­hmun kaltlanga lirthei tlân dan tur tihdanglam a nih dawn thu a puang. Ruahman dan chuan, October 12-13 chhung chuan inkhawm ṭan hma leh inkhawm bân laiin Chawlhhmun venga kawngpui ṭhenkhat chu one way-in lirthei an tlantir dawn a ni.

Mizo Zirlai Pawl (MZP) headquarters, Kolasib chuan nimin khan Kolasib Diakkawn YMA Hall-ah an kum 40-na, ruby jubilee an lawm a, minister of state Dr K Beichhua'n a hmanpui. K Beichhua chuan, zirlaite chu ram nghahfâk an nih avangin an nun uluk a, ruihhlo laka fihlim tlat turin a fuih. Kolasib MZP hian jubilee lawm nan Kolasib-a college leh higher secondary school-te tan hnam lâm intihsiak an buatsaih a ni.

Mizo National Women Front chuan nimin khan Darlawn V/C House-ah Mizo hmeichhia, ram tana pên chhuak tawh mi 36-te hnenah chawimawina parṭhi leh thuchei an hlân. Chawimawite chu Darlawn, Pehlàwn, East Phaileng, Sàwleng, Ratu, Kepràn leh Khawruhlian khuaa mite an ni. MNWF hian Mizoram pumah Mizo hmeichhia, ram tana pên chhuak mi 248 hnenah chawimawina an hlân tawh bawk.