Mizoramin zirnaah harhna a mamawh - Education Minister
Mizo Students Union (MSU)-in October 8, 2019 zan aṭanga Bairabi-a General Conference vawi 18-na an hman chu nizan khan a ṭiak. October 9, Nilaini zana khuallian, School Education minister Lalchhandama Ralte chuan, Mizoramin zirna (education)-ah harh tharna a mamawh thu a sawi.
Lalchhandama Ralte chuan, Mizoramin hma lam a pan zel theih nan khawtlang nu leh pate leh zirlaite an ṭan tlan vek a ngai tih sawiin, "Zirna hian kan society-ah hmun sang ber a chan a ngai. Zirna hmun ngaih pawimawh leh vawn zahawm kawngah te, zirtirtute inthlahdah leh inthlahdah lohah pawh khawtlang nu leh pate'n tun ai hian ngaihven ila, chu chuan kan ramah education revival a thlen dawn a ni," a ti.
Education Minister chuan, "Mizote'n talent (theihna) kan nei ṭha a, India ramah pawh skill nei ṭha pawl tak kan ni a, mahse, kan skill hi engati nge sang takah kan vawrh theih loh?" tiin Mizo zirlaite puanven sâwi chhíng turin a fuih a; Mizo ram leh hnam a him zel theih nan ṭhalaite'n an thinlung lailumah Mizo nationalism an dah a pawimawh thu a sawi.
MSU General Conference-ah MLA Lalrinsanga Ralte chu khualzahawm a ni a, thu sawiin, "Kan ramah all India service-ah Mizo kan awm loh hun a thleng thuai dawn. Nationalism hi sawi sawi mah ila, sorkar ki pawimawhah hnam dang an awm fur chuan nationalism sawi sawi hian awmzia a nei lo thuai dawn. Chuvangin, Mizo ṭhalaiten zirnaah ṭan kan lak a ngai a ni," a ti.
Nilaini zana MSU conference-ah hian 'Zo ṭhat zan' an hmang a, conference-a telte'n hnam thuam an inbel a, hnam lâm leh zai chi hrang hrang entir a ni. MSU conference hi nimin khan chhunzawm a ni a, minister of state K Lalrinliana khuallian a ni. K Lalrinliana chuan, zirlaite chu intodelhna kawngah rual el turin a chah a, "Eng nge kan ramin a mamawh tih hre turin ngaihtuahna hmang ila, kan ram chhung ngeia kan intodelhna tur khawp Pathianin min pekte hi i hai chhuak ang u," a ti.
Ramri chungchang sawiin K Lalrinliana chuan, "Ramri humhalhna kawngah kan chêt a ngai a, kan ta kan hauh ngam a ṭul a, kan ram kan luah lohte pawh véng turin a ṭulna-ah chuan police-te kan tír zel ang," a ti a; ramri humhalh turin ramri hnaiah awm peih a ngaih thu sawiin, ramri hrúla awm peihte tan hma an la mek tih a sawi.