CodNerc-in Bridge IT project thlir lêt

CodNerc chuan Bangalore-a non-go­vernmental organisation (NGO) pakhat Development Focus nen Mizorama Bridge IT project an kalpui chu nimin khan CodNerc director B Lalchhanzova hoin Dawrpui Hnamro Meeting Hall-ah an thlir lêt.

B Lalchhanzova chuan, Mizo ṭhalaite'n kaihruaitu ṭha an neih chuan hma lam pan an châk tih sawiin, "Chutiang kawnga min kaihruai thei tur Bridge IT Project kan kalpui thei hi a lawmawm hle. Mizo ṭhalaite hian kan awm zel dan tur mahni ṭheuh inzir chiang a, mangan nacháng kan hriat a ṭul. Neih nei si loa engtháwl taka kan awm rei lutuk ṭhin hi kan retheih chhan leh ruihhloa kan tlûk luh chhan zinga mi a ni," a ti.

Bridge IT project hi April 2018 aṭang­in Tata Consultancy Services (TCS) puihnaa kalpui ṭan a ni a; a tum ber chu - thingtlang leh khawpuia chengte information technolo­gy lama an inthlauhna tinêp tura hmalak a ni. Aibawk leh Thingsul­thliah RD block chhunga khaw 24-ah an kalpui mek a; khaw tin aṭangin ṭhalai kum 18-25 inkar pakhat ṭheuh thlangin, mi 24-te chu project kaltlangin projector, laptop, netbook, speaker leh stipend-te pein e-business hmanga eizawnna tur bul an ṭansak a ni.