HIV do beihpui thlakna tur Chief Minister-in a hawng

Inkhawm hi Aizawl DC Vanlalngaih­saka'n a kaihruai a; Chief Minister chuan, HIV chu khawvelin a buaipui a nih avangin a donaa hmalak a pawimawh hle tih a sawi a, "Tun hma chuan phár te, TB leh cancer chu thihpui tur natnaa ngaih ṭhin a ni a, tunah erawh a tihdamna damdawi hmuhchhuah niin, mi tam takin an dampui tawh. HIV chu a tihdamna tur hmuhchhuah a la nih loh avangin, kai lo tura mahni invawn uluk chu tih dan ṭha ber a ni," a ti.

Zoramthanga chuan, HIV chu mahni thiam loh ni loa kai palh theih a nih avang­in, natnain taksa a tihchhiat loh nana inenkawl chu tihmâkmawh a nih thu sawiin, "Mithiamte thurawn ngaih pawimawh a ṭul. Mizoramah HIV vei an pung zel a, India ramah AIDS vei tam lama pakhatna kan ni hial hi a chhuanawm loh hle. HIV do kawngah nasa zawka ṭan lak a ṭul," a ti a; naupang ber aṭanga upa ber thlenga fimkhur a ngaih thu a sawi.

MSACS project director Dr Lal­thleng­­­liani'n Mizorama HIV dinhmun tlangpui a sawifiah a, "HIV kai lo tura inzirtirna atan thuziak kan târah mipat hmeichhiatna hmang lo thei lote condom hmang tura kan fuih ṭhin hi mi ṭhenkhatin condom an sawimawinaah an ngai a, hei hi a dik lo. Mizorama HIV kai tam zawk chu mipat hmeichhiatna hman khawloh aṭanga kai an nih avangin, insúm thei lote chu natna ṭha lo an kai loh nan condom hmang tura inzirtirna mai a ni," a ti.

MSACS Project Director sawi danin, Mizoramah AIDS vanga thi mi 2,000 vel an awm tawh. HIV chu India ramah a hniam zawnga a kal mek laiin Mizoramah chuan a pung tulh tulh thung a; thisen endik tawh aṭangin Mizoram mipui 2%-in HIV kai ang a ni. Zirchiannaa a lan danin, HIV/AIDS do kawngah ram hruaitute'n tih tak takna nena an do a, department hrang hrang, tlawmngai pawl leh kohhrante nen thapui thawha an beih chuan a tlakhniam theih beisei a nih thu Dr Lalthlengliani chuan a sawi a, "Thawhhona ṭha neih a pawimawh a ni," a ti.