KHAWTHLIR

Mizoram University-a NSS Unit chuan nimin khan MZU campus-ah blood donation campaign an huaihawt a, Aizawl Civil Hospital tan thisen unit 334 an pe a, a petute mipa 265 leh hmei­chhia 69 an ni. Nimin vêk khan Wesleyan Metho­dist Youth Fellowship (WMYF), Kolasib Venglai chuan WMYF Day pualin Kolasib District Hospital-ah thisen unit 4 an pe bawk

Cod Nerc chuan Church Auxiliary for Social Action (CASA) puihnain nimin khan Lalleng­vung­a High School, Thenzawlah career guidance awareness campaign an hmang a, zirlai eng emaw zat an tel. Campaign-ah hian Cod Nerc diretor B Lalchhanzova'n fuihna thu a sawi a ni.

Kumina World Sight Day (October 10) pualin Natio­nal Programme for Control of Blindness & Visual Impairment chuan nimin khan Reiek damdawi-in (PHC)-ah Eye Screening Camp an buatsaih. Camp-ah hian mit doctor pahnih leh opthalmic assistant parukte'n harsatna neite an endik a, a thlawnin damdawi eng emaw zat an pe nghal. Reiek Zokhua convention hall-ah World Sight Day pualin inkhawm neih a ni bawk a, Health principal director Dr F Lallianhlira'n a hmanpui a ni.

Khawzawla Rural Development department leh PHE department chuan nimin khan Presbyterian English School, Khawzawl zirlaite tan Swachhata Hi Seva hnuaiah Plastic Free Campaign an buatsaih. Zirlai naupangte chu plastic ṭhat lohzia zirtir an ni.

Nimin khan Lunglei DC Conference Hall-ah RTI Week 2019 pualin hun hman a ni a, Lunglei additional DC David Liansanglura Pachuau khuallian a ni. Inkhawm hi Lungleia IPRO C Lalremruati'n a kaihruaia a, Lunglei College-a associate professor R Lalrochama, RTI master trainer ni bawkin RTI Act chungchang a sawifiah.Siahaah pawh nimin khan DC conference hall-ah RTI Week hman a ni a, SDO(S) B Malsawmtluangi'n kaihruaiin, district bawrhsap Bhupesh Chaudhary chu khuallian a ni. He hunah hian resource person N Vabeiratlua, IPRO-in RTI Act, 2005 leh Mizoram RTI Rules, 2010-te a sawifiah a, zawhna leh chhanna hun hman a ni bawk.