Dr Thangtea'n Union Health Minister a kâwm
Conference of Central Council of Health & Family Welfare vawi 13-na Prithvi Bhavan, New Delhi-a neiha tel Health minister Dr R Lalthangliana chuan Union Health minister Harsh Vardhan hnenah Mizoram sorkar mamawh leh hmalaknate a thlen.
Dr R Lalthangliana chuan, Mizoramah sorkar enkawl Health sub-centre 313, primary health centre 57 leh urban primary health centre pariat a awm thu sawiin, "Heng sub-centre, PHC leh UPHC 378-te hi kum 2022 hmain Health & Wellness Centre-ah hlân kai hman vek tum a ni a, March 2020-ah chuan sub-centre 49, PHC 56 leh UPHC pariat, a vaiin centre 113-ah hmalak theih beisei a ni," a ti.
R Lalthangliana thu thlen dangte
l India rama AB-PMJAY healthcare scheme kalpui mekah chhungkaw pakhat tana premium Rs. 1,052-a ram pum a chawhrual chu hmarchhak state tan a beitham a, ennawn a, hmun dang nena hrût rual lo turin a ngen.
l National Health Mission (NHM) sum tam zawk Mizoram tan ruahman turin a ngen.
l Upa zawkte damdawi-in hrang hranga an awmna tur bik khum siamna tura Mizoram sorkar hmalak dan leh sum mamawh belh turte a thlen.
l Tertiary Cancer Care Centre (TCCC), Zemabawka dinna atan sorkar laipuiin cheng vbc. 44 a pawm tawh leh vbc. 14 chiah a la pek chungchangah, sum la pek chhuah lohte pe turin a ngen.
l Mizorama cancer bik enkawlna tur specialty hospital dinna tura JICA, Japan nena thawhhona tur cheng vbc. 500 project tihfel tawh chungchang a hrilh a; sum mamawh belh a awm chuan Central sorkar puihna mamawh a nih tur thu a thlen.
l Mizorama mental hospital, cheng vbc. 49 sénga din tur DoNER-a thlen tawh chu a hlawhtlin theih nan theihtawp chhuahpui turin a ngen.
l Medical education changtlung zawk, bungrua leh food & drugs lama hmasawnna turte a thlen.