MPYCC-in kawng chhia siam turin sorkar phût

Mizoram Pradesh Youth Congress Committee (MPYCC) chuan thu­chhuah siamin, MNF sorkarin hmun hrang hranga kawng an siam, kum khat pawh a tlin hmaa nasa taka a chhe leh tawh chu zahthlak an tih thu an tarlang a; sorkar chu kawngpui chhiate siamṭha leh nghal thuai turin an phût.

MNF chu Mizoram puma kawngpui chhia zawng zawng siamṭha vek tawh angin an inchhál tih sawiin MPYCC chuan, "June 26, 2019-a Assembly session-ah, 'MNF ministry-in hun rei lo te chhunga Zoram dung leh vânga kawng chhe tak a siamṭha mai hi a lawmawm kan ti hle,' tiin Pu Zothantluanga, MLA private resolution an pass a ni," an ti a; MNF hotute'n kawng siam thu an tlangaupui nasa a, MNF vice president Dr R Lalthangliana phei chuan, 'MNF kan sorkar aṭanga rei lo te chhungin kawngpui kan siamṭha vek hman' a tih thu an sawi.

Congress ṭhalaite chuan, MNF-te'n Mizorama kawngpui zawng zawng siamṭha tawha an insawi laiin, Mizoram châk lakna kawngpui pawimawh ber Buichali leh Khamrang inkar kawng chu kum khat pawh a tlin hmain a chhe leh tawh hle tih an sawi a, "Motor lian rit phur leh zin veivâkte tana zawh huphurhawm khawpin a chhe hle a ni. Keifang leh Champhai inkar kawng phei chu a chhe nasa a, motor intlân chhâwk hun siam hial a ni," tiin, chu chuan mipui tan harsatna a siam nasat thu an tarlang.

MPYCC chuan, Congress sorkarin kawngpui siamna atana sum a dah sa leh hman mai theih tura a ruahman sa, fûr ruahtui tlak rei leh 2018 MLA inthlanpui vanga hman leh hman si lohte chu MNF sorkarin an rochun tih an sawi a, "MNF sorkarin hmun hrang hranga kawng a siam, kum khat em pawh a vei hmaa a chhe leh nasa tawh hle mai hi pawi kan tiin zahthlak kan ti hle. Assembly House-a Zoram mipui hmaa an inchhàl ang ngeiin, an kawng siam chhe leh­nghalte hi siamṭha leh vat turin kan phût a ni," an ti.