CM-in Hostel for HSS Students thar a hawng

School Education depart­ment leh Central YMA hma­laknaa Lawipu, Aizawla higher secondary school zirlai awm­na tur hostel sak thar chu October 10, Ningani tlai khan chief minister Zoramthanga'n a hawng. Hostel hi a enkawltu tur CYMA kutah hlan nghal a ni.

CM Zoramthanga chuan, thingtlang lam zirlai Aizawla awmte tana hostel siam chu ṭangkai taka hman a nih a beisei thu sawiin, ram hmasawn theihna tura Mizoramin malsawmna a neih sa ang angte chu ruahmanna fel tak, kim taka thlirna nen a ṭangkai thei ang bera hman thiam a pawimawh thu a sawi.

Mizoram chu ṭhenawm state leh ramte nen khaikhinin, phai záwl hmun rem ṭha, awlái taka hmalakna kalpui theihna hmun angin lang lo mah se, ram chhengchhe zawkte pawh tumruhna leh ngaih­tuahna fing hmangin ram chang­kanga siam a nih thu a sawi a, "Mizoramah pawh thil awm sa hrang hrang - a chhunga chengte châwm zo thei ram zau, boruak nuam, ruahtui ṭha, lui tam leh a mi chengte pawh ṭawng khat hmang, sakhaw khat vuan, heng zawng zawng hmang ṭangkai hian Mizoram hmel hi thlak danglam theih a ni," a ti.

School Education minister Lalchhandama Ralte chuan, hostel chu CYMA leh School Education department-te'n thawh dunna thuthlung an siam tawh rah chhuah pakhat a nih thu a sawi. Central YMA president Vanlalruata pawhin thu sawiin, Aizawl páwn aṭanga lehkha zirte tana awmna tur hmun changtlung tak siam a ni chu phûrawm a tih thu a sawi a, "School Education department hmalakna leh sorkar chungah lawmthu kan sawi a ni," a ti.

Hostel for HSS Students hi School Education department hmalaknain DoNER ministry aṭanga non-lapseable central pool of resources (NLCPR) sum nuai 520.48 hmanga sak a ni a, a sakna hmun hi CYMA ram a ni. Building atan hian North East Consultancy Services (NECS)-in kum 2013-ah DPR siamin, kum 2014-ah DoNER aṭangin sum hmuh a ni a, May 2016-ah sa ṭanin, April 18, 2019-ah sak zawh a ni.