Nungcha humhalh ṭhate award hlân

Advocates for Zo Nationalism (AZN) chuan nimin khan Hotel Regency-ah nungcha leh ram­ngaw humhalhna kawnga thawk ṭhate hnenah AZN Award an hlan a, Lok Sabha MP C Lalrosanga'n a hmanpui.

MP C Lalrosanga chuan, Mizoramin mumal leh huam zau zawka environment policy a neih a ngaih pawimawh thu sawiin, "Sik leh sá inthlak danglam vang leh chhan hrang hrang vangin environment humhalhna kawngah nasa zawka ṭan lak a ngai," a ti.

C Lalrosanga chuan, Citizenship Amendment Bill (CAB) chung­changah hmarchhak state MP-te'n Prime Minister, Home Minister leh mi­nister dang­te an sawipui tawh thu a sawi a; CAB chu sorkar laipuiin kal­tlangpui a tum pawhin, hmarchhak state-te huamtir ve lo tura an ngen tawh thu leh, kaltlangpui dawn chuan state sorkar hotute nen inráwn khawm se an duh thu an lo thlen tawh thu a sawi bawk.

AZN Award hi pawl pali hnenah hlan a ni a, Rs. 10,000, thuchei leh trophy a keng. Award an hlante chu - Mizoram Environment and Forest Consultative Forum (MEFCOF), JB Paws, H Lalhmunsiama (Nungchate ṭhian) leh C Lalhmingthanga (Rimawi ram)-te an ni.