Covid vaccine mi 3,979 pe tawh Vaccine la harsatna lian tâwk an awm lo
January 23, Inrinni khan Mizoram chhung hmun hrang hrangah damdawi-ina thawk (healthcare worker) mi 322 hnenah Covid laka invènna damdawi Covishield pek leh a ni a; heti hian January 16-23, 2021 chhungin Mizoramah mi 3,979 hnenah Covid-19 vaccine pek a ni tawh. Thuneitute chuan, vaccine lâk vanga harsatna tênau nei awm mah se, thil hlauhawm a nih loh thu an sawi.
Covid vaccine chung changa sorkar thupuangtu Dr Lalzawmi chuan, an hna pangngai dangte hlamchhiahin Covid vaccine ringawt an buaipui thei bik lo a, chuvang chuan Covid vaccine pek pawh duhthusamin a chak thei lo tih a sawi.
Dr Lalzawmi chuan, "Kan hna pangngai kan hlamchhiah tawp thei lo a, kan thawh ve reng tho a ngai a, vaccine dang kan buaipui tel ve reng a ni. Covid vaccine avang hian pulse polio (zenghri danna) vaccine pek kan tikhawmuang tawh a, Mission Indradanush pawh tih leh a hun tawh a, vaccine thar Pneumonia laka invènna pawh pe turin an rawn ti leh tawh a ni," tiin Vanglaini palai a hrilh.
Covid vaccine lak vanga harsatna nei an awm leh awm loh zawhna chhángin Dr Lalzawmi chuan, harsatna tênau nei eng emaw zat an awm thu a sawi a, "Khawsik te, lu ná te, taksa sil ṭhém ṭhúmte an awm a, hengte hi chu a nih dan tura kan ngaih sa a ni," tiin, thil hlauhawm a nih loh thu a sawi.
Dr Lalzawmi chuan, vaccine hrim hrimin side effect a nei fo tih sawiin, "Naupangte pawh vaccine pek hmain nachhâwknate pek hmasak an ni fo. Covid vaccine-a side effect awm pawh hi thil hlauhawm a ni lo a, tuna pek tawh zingah pawh harsatna tênau nei awm mah se, harsatna lian tham nei an la awm lo," a ti a; Covid vaccine chu lak a hlauhawm loh thu a sawi a ni.
Covid vaccine hi a pekna tura ruahmanah pek chhunzawm zel a ni a, district tinah pek a ni tawh a; tun dinhmunah chuan healthcare worker-te chiah la pek a ni. Niminah erawh chuan Pathianni a nih avangin damdawi hi pek a ni lo.
Vaccine hi healthcare worker zingah pawh pek hmasak tura ruahman mi sang riat chuang zingah a zatve an la pe tling lo a, pek chhungin hun a duh rei deuh dawn nia thu dawn a ni. Vawiin hian vaccine pek chhunzawm leh a ni ang.
Hetih lai hian, Tipa (Tuipáng) damdawi-inah pawh Inrinni khan vaccine pek ṭan ve leh a ni a, vaccine pek ṭanna puala inkhawm neih zawhah pek nghal niin, mi 60 hnenah pek a ni. Vanccine pek ṭanna puala inkhawm hi Tipa SDO (Civil) Lalhmingliana'n a hmanpui.