Loneitu PMKMY-a inziak lut an la tlem Agri. Minister-in inziaklut turin a sawm

Sorkar laipuiin lo nei­tu­te tana pension scheme a duan, Pradhan Mantri Kisan Maandhan Yojana (Farmers' Pension Scheme)-ah inziak lut an la tlem a, nimin thleng khan mi 271 an inziak lut tawh. Agriculture minister C Lalrinsanga chuan lo neitute chu inziak lut turin a sáwm.

Vanglaini palai zawhna chhangin Agri­culture Minister chuan, PMKMY-ah inziak lut an la tlem thu a sawi a, "PMKMY hi lo neitute tana hamṭhatna ṭha tak a ni a, mahse, inziak lut an la tlem hle. Deptt. chuan a tam thei ang inziak lut se kan duh. Mi tam zawk an inziah luh theih nan kawng hrang hrangin hmalak zel kan tum," a ti. 

Agriculture Minister sawi danin, common service centre (CSC) hnai berah Aadhaar card leh bank passbook kengin PMKMY-ah inziah luh theih a ni a; sum sên a ngai lo a, kum 18 tling chinte inziah luh theih niin, thla tin pawisa thawh ve a ngai thung. Pawisa an thawh zat ang chiah sorkar laipuiin a thawh ve dawn a ni.

PMKMY-a inziak lutte chu kum 60 an tlin hunah thla tin pension Rs. 3,000, an dam chhung zawng an la thei dawn a, kum 60 hmaa an thih pawhin an chhungte tan hamṭhatna hrang hrang a awm. Inziah luh ṭan laia kum zat azirin thla tina sum thawh ngai zat a danglam a, kum 18-40 inkar tan inziah luh theih a ni.

Inziak lut thei naupang ber (kum 18) mite'n thla tin Rs. 55 an thawh a ngai a, inziak lut thei upa ber (kum 40) miin Rs. 2,000 an thawh a ngai. Pawisa hi thla tin kum 60 tlin hma chu thawh tur a ni. Lo neitu chu kum 60 a tlin hmaa a thih chuan a nupui/pasalin kum 60 a tlinin pension a dawng chhunzawm thei ang. Nupaa inziak lut tan erawh dawn theih a ni lo.

PMKMY hi September 24, 2019 khan Assembly Annexe conference hall-ah Mizorama hman ṭan theih turin Agriculture minister C Lalrinsanga'n a hawng a ni.

Aizawl                31

Champhai        7

Kolasib            4

Lawngtlai            193

Lunglei            8

Mamit                12

Siaha                1

Serchhip            15

Total                271