Lunglei Civil Hospital aṭangin Nausén rûk chhuah a ni

Tiperaghat khaw mi Dilon Chakma leh Surota Chakma te nupa fa, ni 4 mi chu nimin zing khan Lunglei Civil Hospital aṭangin rûk chhuah a ni. Police-te'n an chhui zui nghal a, he thu ziah lai thleng hian hmuh a la ni lo.

Lunglei SP Stephen Lalrinawma hnen aṭanga Vanglaini thu dawn danin, damdawi-ina fourth grade thawmhnaw hâk ṭhin ang chiah ha, kawrlum pàwl hà hmeichhe pakhatin nimin zing dar 4 velah nautê hi sick newborn care unit (SNCU)-ah dah a ngaih thu sawiin, a pawm chhuak a ni.

Nausên pawm chhuaktu hian a laknaah zing dar 5:30 velah dah let leh a nih tur thu sawi mah se, a intiam hun zing dar 5:30 velah pawh a dah lêt loh avangin a chhungte'n damdawi-ina thawktute an hrilh a; an ngaihven hnuah naute chu SNCU-ah a awm lo tih hriat a ni.

Naute chhungte chuan nimin zing dar 8 vel khan Lunglei Police hnenah an thlen a, police-te chuan an chhui zui nghal a, he thu ziah lai thleng hian hmuh a la ni lo. 

Stephen Lalrinawma chuan, Lunglei lama hotel leh damdawi-in dang zawng zawngte pawh an endik tawh tih sawiin, "CCTV footage aṭangin naute pawm chhuaktu nia sawi hi a pian zia leh thawm­hnaw vel hriat theih a ni a, khaw thim lai a nih bakah, mask a vuah avangin a hmel hmuh theih a ni lo. Lunglei leh a chhehvela police station zawng zawngah CCTV footage thawnin, uluk taka lo ngaihven turin kan hriattir tawh. Theihtawp chhuahin kan chhui mek a ni," a ti.