COVID-19: Mizoram dinhmun Ni 2 chhungin hripui vei 2 hmu

January 22, Zirtawpni­ah swab sample sang khat chuang endik ni mah se, Covid-19 vei hmuh chhuah a ni lo a, January 23, Inrinni khan mi pahnih hmuh chhuah a ni. Inrinni leh nimin khan hripui laka fihlîm tawh mi panga chhuahtir an ni thung.

Covid-19 vei Inrinnia hmuh chhuahte chu ZMC laboratory-a hmuh ve ve an ni a, TrueNAT-PCR leh Rapid Antigen Test (RAT) hmanga sample endik zing­ah hripui vei hmuh a ni lo. 

ZMC-a Covid-19 vei hmuh mi pahnih zinga pakhat chu Kulikawna mipa kum 27 mi, a chhungte zinga hripui vei hmuh tawh vanga ina inkhung mek a ni a, symptom a nei lo. Pakhat dang chu Saron Venga hmeichhia kum 32 mi, tun hnaia Maharashtra aṭanga haw a ni a, symptom nei lo a ni.

Covid-19 laka fihlîm tawh mi pahnih chu Inrinni khan chhuahtir an ni a; nimin khan Zokhawsang CCC aṭangin mi pathum leh Durtlang BSUP CCC aṭangin mi pahnih an chhuak bawk.

Mizorama Covid-19 vei hmuh chhuah tawh chu mi 4,351 an ni a, mipa 3,184 leh hmeichhia 1,167 an ni. Nimin tlai dar 5 thleng khan mi 4,289 (98.57%) chhuahtir an ni tawh a, mi pakua (0.21%) thi tawhin, enkawl mek mi 53 (1.22%) an awm.