KHAWTHLIR

Kolasib SP Vanlalfaka chuan Khamrang leh Buichali (NH-54) inkar kawng thawm ṭhat hna vawiin (January 25)-ah ṭan a nih dawn avangin kawng khâr hun leh hawn hun siam a nih thu a tarlang. SP tarlan danin, kawng khâr hun chu zing dar 6 aṭanga chhun dar 1 inkar leh tlai dar 3-5 inkar a ni a, chhun dar 1 aṭanga tlai dar 3 inkar leh tlai dar 5 aṭanga a tuk zing dar 6 inkarah hawn a ni ang.

Evangelical Church of Maraland (ECM) KTP-a New Laty & Serkawr Pastor Bial chuan January 23, Inrinni khan thisen pek an huaihawt a, Siaha District Hospital tan thisen unit 42 an pe. Aizawla Arsenal FC ṭantute pawhin Civil Hospital, Aizawl Blood Bank-ah thisen an pe bawk.

Kristian Ṭhalai Pawl (KṬP)-te chuan January 23, Inrinni khan hmun hrang hrangah bial conference an hmang. Bial KṬP conference hi January 22-24 chhunga neih tur a ni a, hripui léng vangin dan pangngai anga hman theih a ni lo. Bial tam takah chuan sorkarin kal khawm thei zat a bithliahah an inkhung a; rorel leh hruaitu thlannate neih a ni. January 23-a conference hmang thei lote chuan Jan 30-ah an hmang ang.

Sports & Youth Services minister Robert Romawia Royte chuan January 23, Inrinni khan Dawrpui leh Venghnuaia indoor stadium sakte a tlawh. Sports Minister hian CADC leh LADC-a chief executive member-te pawh a pisaah a kâwm a ni.

Aizawl City College Joint Students' Union (ACCJSU) chuan January 23, Inrinni khan Zirtiri Residential Science College auditorium-ah Assembly cum Election an nei a, MLA Zodintluanga Ralte leh Apex Board chairman T Lalmuanpuii ten an hmanpui. Zodintluanga chuan, eng kawngah pawh kal se, dikna, rinawmna leh taimâkna nen kal turin zirlaite a fuih a ni.

Animal Husbandry & Veterinary minister Dr K Beichhua chuan January 22, Zirtawpni tlai khan Siaha Meisatlaa Cattle Breeding Farm chei ṭhat a hawng. Siaha Cattle Breeding Farm-ah hian bawng 26 leh ar 200 vel an vulh mek a ni.

Kolasib Civil Hospital tualah January 23, Inrinni khan Kolasib District Mahila Shakti Kendra leh District Hospital buatsaihin National Girl Child Day hman a ni a, damdawi-ina naute piang hmeichhia pali hnenah thilpek hlan a ni.

State Referral Hospital-ah Covid-19 vei mi pasarih enkawl mek an ni a, an zinga mi paruk chu Isolation ward-ah awmin, ICU-a awm pakhat chu a negative tawh avangin nimin khan ICU Extension-ah sawn a ni a, oxygen nen enkawl zui a ni. Hripui vanga enkawl mek mi pasarih zingah kum 60 chung lam leh naupang an awm lo.