AMC-in kum 2020-21 chhungin Ward fund nuai 950 a pe chhuak

Sorkar kum kal lai, 2020-21 chhungin Aizawl Municipal Corporation (AMC) chuan Ward Fund ṭum li a pe chhuak tawh a, councillor pakhat hnenah cheng nuai 50 ṭheuh pein, a vaiin councillor 19 hnenah nuai 950 pek a ni.

Councillor-te hnena AMC-in sum a pek chhuahte chu 15th Finance Commission sum an dawn aṭanga pek chhuah a ni a; councillor ṭhenkhat chuan an sum dawn aṭangin tun hnaiah tuizém an lei a, an biala hna chi hrang hrang thawh nan an hmang bawk.

Vanglaini palai zawhna chhángin AMC commissioner /administrator K Laldingliana chuan, 15th Finance Commission sum, urban local bodies (ULB) grant an hmuh chu tied fund-ah cheng nuai 1125 leh untied fund-ah nuai 1125 a ni a, a vaiin nuai 2225 an dawn tawh thu a sawi.

AMC Commissioner sawi danin, Finance Commission aṭanga sum an dawn hmangin AMC councillor 19 hnenah inzat vekin sum an pe ṭhin. Kum kal mek 2020-21 chhungin Ward Fund ṭum li an pe chhuak tawh a ni.

Tied fund chu ruahtui khâwl (rain water harvesting) leh bawlhhlawh sâwngbàwl (solid waste management) atan hman theih a ni a, untied fund chu mamawh dang chi hrang hrangah hman tur a ni thung a; office inrêlbàwlna atan hman a rem lo.

Councillor-te chuan untied fund sum an dawn hmangin tuizemte leiin an sem a, tuikhur chei nante an hman bakah, mamawh dangah an hmang niin K Laldingliana chuan a sawi.

AMC-in ward fund a neih hmasak ber chu kum 2016-17 khan a ni a, chumi kumah chuan October 2016 - March 2017 chhungin an pe chhuak. Chutih laia ward fund an pek chu councillor pakhatah Rs. 2,50,000 zel a ni a, a vaiin Rs. 47,50,000 pek a ni.