NEC Meeting-ah Minister Chama a tel

North Eastern Council (NEC) Plenary Meeting vawi 69-na chu January 23-24, Inrinni khan NEC hmunpui, Shillong-ah neih a ni a, Union Home minister Amit Shah, NEC chairman ni bawkin a hmanpui. Mizoram aṭangin Governor leh Chief Minister aiawhin Home minister Lalchamliana a tel.

Home minister Lalchamliana chuan, Union Home Minister hoa NE state hotute leh sorkar laipuia ministry/department pawimawh zawng zawng tela NEC meeting neih a ni chu lawmawm a tih thu sawiin, Mizoramah NEC project ṭha tak tak kalpui tawh ṭhin a nih bakah kalpui mek a nih thu te, hmasawnna hna tam zawk kalpui turin sum leh páiah thuam chak zel ni thei se a duh thute a sawi a ni.

Mizoramin mau lamah chak takin hma a la mek nia sawiin Lalchamliana chuan, "NEC/Ministry of DONER leh sorkar laipui pawhin hemi kawngah hian nasa taka min puih ka beisei. Oil palm-ah pawh hmarchhak state zinga hma la hmasa leh hma hruaitu kan ni a, a chíngtute tana harsata awm thei leh ram tana ṭha tur zawka kalpui dan tur mumal tak ruahman hmasak theih ni se," a ti.

Lalchamliana chuan, Horticulture lamah post harvest management, transportation leh cold storage ngaih pawimawh a ṭul thu te, NE India-ah investment tam zawk lut thei turin Ease of Doing Business lama chak zawka hmalak a ngaih thu te, project management-ah hmasawn turin multilateral leh bilateral funding agency-te nen thawhho ṭhat a ngaih thu te, External Aided Project hmu ṭha leh zual turin funding pattern siamṭhat a, state aṭanga 20% counterpart funding phût chu tihbo ṭha a tih thute a sawi bawk.

NEC Plenary Meeting-ah hian DoNAR minister Dr Jitendra Singh leh hmarchhak biala governor, chief minister, chief secretary leh Planning secretary-te an tel a; Mizoram aṭangin Planing secretary Dr C Vanlalramsanga, OSD cum Home deputy secretary David H Lalthangliana, Planning SRO Lalnunsiami leh Shillong DRC Malsawmzuala te an tel a ni.