Hmarchhak state-ah Mizoramin UC tihkhawmuan a nei tlem ber
India hmarchhak state zingah Mizoram chu North Eastern Council (NEC) hnuaia project kalpui mekah utilization certifiate (UC) thehluh tur tihkhawmuan (pending) nei tlem ber a nih thu, Mizoram sorkar thuchhuah chuan a tarlang.
Sorkar thuchhuah tarlan danin, Union Home minister Amit Shah kaihhruaia January 23, Inrinnia Shillong-a NEC Plenary Meeting vawi 69-na neihah NEC secretary Moses Chalai chuan, NEC hnuaia hnathawhte a tarlang a, Mizoram chu UC thehluhah ti ṭha ber state a nih thu a puang a ni.
NEC hnathawh kal mekah UC (sum pek tawh hman zawhna lehkha) thehluh tur 309, cheng vbc 479.84 hû a awm mek a, Mizoram chuan UC tihkhawmuan panga neiin, chu chu cheng vbc. 5.26 hu a ni. UC tihkhawmuan nei tam ber Arunachal Pradesh chuan UC la thehluh loh 63 neiin, cheng vbc 65.52 hû a ni a; central agency leh a dangte'n UC pending 61, cheng vbc 179.62 hû an nei bawk.
UC tihkhawmuan neih dan
(Rupees in crore)
State Pending Sum zat
Mizoram 5 5.26
Tripura 12 25.38
Meghalaya 12 21.41
Sikkim 15 17.22
Assam 39 51.61
Nagaland 40 50.56
Manipur 50 63.26
A.P. 63 65.52