AMC hi state sorkara innghat a ni lo - Zodintluanga
Mizoram Pradesh Congress Committee (MPCC) treasurer Zodintluanga Ralte, MLA chuan, Aizawl Municipal Corporation (AMC) sorkarin mipui tana harsatna an siamte siamṭha turin Congress party an sorkar a ngai nia sawiin, "AMC hi state sorkara innghat a ni lo," a ti.
Zodintluanga Ralte hian AMC inthlan atana campaign beihpui thlak mekah January 23, Inrinni zing khan Tlangnuam kâwnah thu a sawi a; "AMC hi state sorkara innghat a ni lo a, sorkar laipui aṭangin sum an dawng ṭhin," a ti a, central aṭanga sum lo kal chu state sorkarin ni nga chhunga a pe chhuak lo a nih chuan state sorkarin a pung a chawi a ngaih thu a sawi. AMC sorkarin mipui tan harsatna tam tak a siam nia sawiin Zodintluanga chuan, "Hengte hi siamṭha turin Congress kan sorkar a ngai. Tih tur tam tak kan nei a, bawlhhlawh paih dan harsa lutuk hi kan ngaih pawimawh ber zinga mi a ni a, kan candidate hi in thlan tlin chuan kar khat chhungin bawlhhlawh paih dan awlsam kan siam dawn a ni," a ti.
MPCC Treasurer chuan, tun hnaia Deputy Chief Minister-in in sak tur lungphùm a phùmte chu Congress sorkar lai, kum 2018-a sanction awm vek tawh a nih thu sawiin, "Kum hnih chhunga hmalakna an nei thei lo hi a mak hle. Kum 2020-21 sum phei chu hman chu sawi loh, K-deposit-ah vek a awm mai a ni," a ti a; MNF sorkar chu hnathawk muang leh sum enkawl thiam loah a puh.
MPYCC president Dr Lalmalsawma Nghaka pawhin thu sawiin, tih tura intiam tawh ti hlawhtling ṭhinte ngaihtuah chian a ngaih thu a sawi a, "MNF sorkar hi an mumang aṭanga ben harh an nih theih nan kan candidate-te lo vote turin kan ngen a che u," a ti.