Minister-in Saisihchhuah ramri a tlawh
Commerce & Industries minister Dr R Lalthangliana chuan January 23, Inrinni khan India leh Myanmar ramria insumdawn tawnna tur, Lawngtlai district-a Saisihchhuah border haat a tlawh.
Dr R Lalthangliana chuan, Saisihchhuah border haat-a ram pahnihte insumdawn tawnna tura hmalakna kal mek chu economy-a Mizoram chawikang thei tur pawimawh tak a la nih dawn thu a sawi a, "Mipui chhawr theih hun a nghahhlelh awm tawh hle. Hmachhawp mek, lei dawh leh hmalakna tur la awmte chak zawka bawhzui a nih theih nan sorkar laipui bakah, Myanmar sorkar hotute a theih angin a rang lamin ka la sawipui ang," a ti.
Covid-19 hripui léng chungchang sawiin Minister chuan, "State dangte nena khaikhinin Covid-19 vanga thi tlemna ber state kan ni hi a lawmawm tak zet. Mizoram mipuite kan zavaia ṭan tlànna rah a ni," a ti a; hripui donaah Mizoram chu India state zinga ti ṭha ber a nih thu a sawi.
Dr R Lalthangliana hi Health & Family Welfare Board vice chairman ZR Thiamsanga, MLA-in a ṭawiawm a; South Vanlaiphai Tourist Lodge-ah South Tuipui MNF Block-II political training an hmanpui nghal a ni.