Mi 3,976-in State Library an tlawh

Art & Culture department enkawl Mizoram State Central Library chu tun hnai thla 12 chhungin mi 3,976-in an tlawh a, lehkhabu thar 1,640 leh member ziah luh thar 396 an awm.

State Central Library record-a a lan danin, Mizoram State Central Library hian Raja Rammohun Roy Library Foundation (RRRLF) matching scheme kaltlangin kum khat chhungin sorkar hriatpui library 500-ah lehkhabu a sem a; RRLF hnuai­ah tho sorkar hriatpui NGO library building 12 sak a nih bakah, RRRLF non-matching scheme hnuai­ah children corner 10 leh knowledge corner pali siam a ni.

Mizoram State Central Library hian December 15, 2018 aṭanga November 15, 2019 thleng khan lehkhabu 580 an lei a, mi ṭhahnemngaite'n lehkhabu 466 an pek bakah, RRRLF aṭang­in lehkhabu 594 an dawng. Lehkhabu an neih thar zawng zawng chu 1,640 a ni a, chutih laiin, lehkhabu 1,366 hawh chhuah a ni. Library member tura ziah luh thar mi 393 an awm a, chu'ngte chu naupang 57 leh puitling 339 an ni a; tun dinhmunah registered member 7,029, puitling 5,962 leh naupang 1,067 an awm mek a ni.

State Central Library-ah hian lehkhabu 67,592 a awm mek a, chu'ng zinga 5,481 chu naupang chhiar chi niin, Hindi 17,427 a awm. Library hian chanchinbu 16 leh magazine 19 a la (subscribe) bawk.