Naupang rukbo ching nia rinhlelh mante rukbo ching an ni lo tih finfiah a ni
Mamit district chhung Saikhawthlir daia naupang rukbo ching nia puh hnamdang pahnihte chu naupang rukbo ching an ni lo tih police-te'n an finfiah a, hetihlai hian ILP an neih loh avangin man an ni tho.
Police hotute hnen aṭanga thudawn danin, naupang rukbo tum nia sawi an man pahnih zinga a upa zawk hi kutdawh, hmun hrang hranga vak kual ṭhin a nih bakah rilru lama harsatna nei a ni. Saikhawthlir daia leilet hmuna a kal chu a bul hnaia awm naupangten hlauin an tlanchhia a, hei hi puitlingin an hriat ve leh an man nghal a ni.
Hemi hnu deuh hian kawnga an kal laiin an man zinga naupang zawk hi an tawk a, an man hmasak hian a ṭhianpa nia a sawi avangin an man ve nghal a, an mi mante hi Bairabi Police Station-ah an hruai a ni. Police-te'n an chhui chianna aṭangin heng mi pahnihte hi naupang rukbo tum an ni lo tih hriat a ni.
An mi man zinga a upa zawk chu a chhungten Bairabi Police Station-ah rawn ngaihvenin, mi a ang pha chiah lo tih an sawi a, pakhat zawk pawh ABCI-a cook hna thawk ṭhin a ni. An chhui chianna aṭangin heng mi pahnihte hian Mizorama lut tura phalna ILP an neih loh avangin tunah hian Bairabi Police Station-ah hren mek an ni.