Police indaih lohna a nasa - DGP

DGP SBK Singh chuan Mizoramah police indaih lohna a nasat thu sawiin, "Tun aṭanga thla 4/5 velah police 650 vel lak thar tura ruahmanna siam mek a ni," a ti. September 12, Inrinni khan DGP hian Mamit Police hmunpui a tlawh a,  an dinhmun a enfiah a ni.

Mamit khawtlang hruaitute'n an district-ah police indaih lohna a nasat thu an lo thlen chungchangah DGP chuan Mizoramah kumtin police mi 300 vel an pension ziah thu sawiin, "Heng pension-te hnawhkhahna tur hian police lak thar leh nghal zel anih loh avangin Mizoramah police indaihlohna a nasa hle a ni," a ti.

SBK Singh sawi danin, Mizoramah police 21,000 vel awm tur a nih laiin tun dinhmunah 9,000 vel an awm a ni. Police in daih lohna zualpui phuhruk tur hian police 650 vel lak belh tura ruahmanna siam mek a ni. Police station hrang hranga lirthei an neih ṭhat loh chungchangah pawh a theih ang ang a hma a lak tur thu sawiin DGP chuan, "Mizoram Police-te lirthei hi a hlui tawh hlawm hle a, hemi thlakna tur hian Police Modernization Scheme hnuaiah hma lak mek a ni," a ti.

SBK Singh chuan Mizoram chu hmun nuam, state ralmuang tak a nih thu sawiin, "NGO leh police-te inkarah thawhhona ṭha tak an nei a, Mizoramah remna leh muanna a awm reng theih nan mipui, NGO leh Police te an thawh ho a ngai a ni," a ti a, ruih­hlo dona kawngah leh ramdangmi Mizorama lo lut turte danna kawngahte pawh thawhhona ṭha neih a ngaih thu a sawi.

DGP hian Mamit khaw­pui chhunga child­­ren home pathum - Buannel, Joshua leh Emau te a tlawh nghal a, heng home-ahte hian naupang eitur leh buhfai bag te a pe ṭheuh a ni.