KHAWTHLIR

Tun hnaia International Federation of Organic Agriculture Movements-in Germany-a buatsaih organic farming chungchang zirhona an buatsaihah Agriculture minister C Lalrinsanga leh official-te an tel. Zirhonaah hian khawvel huap pawha hnuhma tam tak lo nei tawh German mithiamte nen Mizorama hmalak dan tur sawiho a ni. Agriculture Minister chuan Switzerland-a Research Institute of Organic Agriculture dintu Organic farm leh labaratory pawh a tlawh a, an hnathawh dante leh organic chung­changa hma an lak dante thawktuten an lo hrilhfiah a ni.

Zemabawk dai, Riangvai Thlanmuala phum tawh ruhro ṭhenkhat chu Aizawl Municipal Corporation (AMC) in Inrinni zing khan a phum ṭha. AMC-in ruhro a phum nawn leh te hi helai hmun AMC in a cheibawl avanga an laih chhuah leh te a ni. Riangvai Thlanmual hi LAD in hun reitak an enkawl hnuah UDPA dept.-in an enkawl a, AMC a lo pian hnuah AMC in a enkawl chhunzawm a, tunah hian cheiṭhat niin, mi 20 vel phum theihna tura siam a ni.

Darzo YMA ten Maj Shakespeare (Tarmita) lo khawsakna hmun hlui tlang chu Inrinni khan an tifai. Kum 1890 vailen lai khan major Shakespeare leh a hote chuan Darzo tlangah hian awm hmun an khuar a, he hmunah hian kulh ṭha tak an siam a, a hmingah an pu General VFW Tregear hming chawiin 'The Fort Tregear'  an vuah a ni. British hun laia Sap hoin kulh  an siam zing ami hi tun thlengin hmuh theihin a la awm a ni.

Seventh-day Adventist Kohhran hnuaia Mizo Adventist Music Association-in Mizo ṭawnga staff notation zirna bu a buatsaih chu Mizo Conference of Seventh-day Adventist treasurer Chawngsiampuia'n nimin khan Republic Vengah a tlangzarh. Staff notation zirna bu buatsaih dan sawifiahtu Zoremmawia Pachuau chuan, staff notation chu khawvel ram tam zawkin an hman a nih avangin music lama hmasawn tur chuan a bo lo tawka thiam a ṭul thu a sawi.