Tripura Bru refugee camp aṭangin Chhungkaw 68 hruaikir an ni tawh

October 3, 2019 aṭanga Tri­pura refugee camp-a Bru lâk lêt thawh 9-na kal mekah chhung­kaw 68 Mizoramah hruai­kir an ni tawh a, hruaikir hna hi thawh chhunzawm zel tum a ni.

Bru hruaikir tawhte hi Lung­lei district-ah chhungkaw 41, Mamit district-ah chhungkaw 21 leh Kolasib district-ah chhungkaw paruk an ni. Mizoram sorkar official-te'n refugee camp-a Bru-te Mizorama kir an duh leh duh loh an zawhfiahnaah chhungkaw 4410 chuan kir an duh thu an sawi. Bru hruaikir hna hi rua­hman dan chuan November 30, 2019 thleng kalpui a ni ang.

Hetihlai hian October 7 khan Bru-te'n phût an neih avangin nimin khan anmahni hruai tumtu sorkar official-te leh lirtheite an lo dang a, lak lêt hna chhunzawm theih a ni lo. Mamit DC Dr Lalrozama chuan Vanglaini palai zawhna chhangin, Bru-te chuan hmun hrang hrangah anmahni hruai kîr tura kal sorkar official-te leh motor-te an lo dan avangin lak lêt hna thawh theih a ni lo tih a sawi a, "Hei vang hian Bru la let tura kal official-te chu an camp - Kanhmun leh Kanchanpur-ah an lêt leh a ni," a ti.

Dr Lalrozama sawi danin, Bru lak hna thawktu sorkar official-te chu Kânhmun leh Kanchanpur (Tripura)-ah an inkulh a; Mizoram aṭanga a hnai deuh camp pathum - Kaskau, Khakchangpara leh Ham­sapara-a mite hruai turte chu Kanhmun­ah an inkulh a, camp hla deuh pathum - Asapara, Naisingpara leh Hazacherra-a mite hruai turte chu North Tripura district hqrs., Kanchanpur-ah an inkulh thung. 

Mamit DC hi October 8 khan Tripura refugee camp-ah hian kalin, Bru lâk lêt hna thawh mek chu tluang taka a kal zel theih nan Mizoram khua leh tui dik tak, Mizorama lêt duhte chu dang lo a, kaltir tur leh harsatna siam lo turin camp hrang hranga awmte a ngen a, Tripura refugee camp-a Bru-te Mizorama haw tawhte leh let tumte chu thinlung takin Mizo mipuite'n an lo lawm thu a sawi a ni. 

October 8 vek khan refugee camp-a Bru pawl hrang hrang - Mizoram Bru Displaced Peoples Forum (MBDPF), Mizoram Bru Indigenous Democratic Movements (MBIDM), Bru Tribal Development Society (BTDS), Bru Displaced Women Welfare Committee (BDWWC), Camp Defence Committee (CDC) leh AII Chudri Committec (ACC) chuan Nasingpara-ah joint meeting an nei a; resolution siamin, Mizorama kir an duh loh chhante resolution-ah hian an tarlang a ni.