Septic tank thlakna atana duan DRDO-in PHE dept. an hlan
Defence Ministry hnuaia Defence Research & Development Organization (DRDO) chuan October 11, Zirtawpni tlai khan Aijal Club-ah septic tank thlakna tura duan Biodigester Technology chu Mizoram PHE department hnenah a hlan.
Sorkar thuchhuah tarlan danin, Biodigester hi DRDO-in kum 25 chhung an zir chian hnua an hmuhchhuah a ni. Biodigester-ah hian mihring ek eiraltu tur hrik, Anearobic Microbial Innoculum (AMI) a awm a, chu chuan mihring ek lo lut thar apiang an lo eiral zel avangin septic tank angin a khat ve dawn lo a ni.
He technology hi DRDO ta a nih avangin a duh apiangin lo siam ve ngawt phal a ni lo a, DRDO-in Licence an pekte chauhin an siamin an sa thei a ni. Tunah chuan PHE department chu Biodigester Technology hmang thei leh DRDO licence neitu a ni tawh a, a hmang duh leh mamawh apiangte tan dawr theih an ni.
Biodigester Ṭhatna nia tarlante :
l Biodigester-ah hian a hmangtu zat inang rengah septic tank aiin ek khur a ngai zim zawk a, a siam man pawh a tlawm zawk a ni.
l Septic tank angin soak pit a mamawh ve loa hei hian a siam man a ti tlawm leh zual a ni.
l Biodigester-te hi an khah ve dawn tawh loh avangin septic tank anga sum tamtak senga paih ruah leh tihfai fo a ngai ve loa, a enkawl man a tlem a ni
l Biodigester-a ek eitu hrikte hi boruak mamawh lo chi an nih avangin boruak lut thei loa phui taka char vek a ni.
l Biodigester aṭanga tui lo luang chhuakte hi septic tank angina rim chhe ve tawh lo a, natna hrik a pai tam tawh lo bawk a, huan thlai chawm tura lei a luan chhuah tir nghal mai tlak a ni tawh.