Inremna leh muanna tichhe zawnga hmalakna kan dodal tlat - HPC (D)
Hmar Peoples' Convention (Democratics) chuan thuchhuah siamin, inremna leh muanna tichhe zawnga hmalakna reng reng an dodal tlat thu an puang.
HPC (D) chuan Mizoram Hmar tlang dung, tuna SHC nita hian hun khirh tak mai tuarin, mahni chanvo leh hmasawnna kawl eng hmu pha loin a a awm ṭhin thu sawiin, "Hnam thilah hial unau hmelhai avangin pafa karah hmelma ang mai a inepna lo awm ṭhin mah se, inremna thuthlung a vawihnihna chu April 2, 2018 khan HPC(D) leh Mizoram sorkarin an lo ziah chu khawvela Hmar mipui leh Sinlung Hills huam chhunga chengte tan mellung pawimawh tak a ni," an ti.
Hmar mipuite mahni chanvo leh nihna (constitutional right & identity) humhalhna chu kum 1985 khan bulṭan a nih thu tarlangin HPC (D) chuan, " July 27, 1994 khan a vawikhatna atan Mizoram sorkar nen inremna thuthlung (agreement) an lo sign a, chu inremna thuthlung chuan ngaihsak a hlawh lo a ni," a ti a, kum1995 aṭang khan HPC(D) chuan ralthuam hmangin SHC tihpuitlin a nih theih nan hmalakna a neih chhunzawm leh thu an tarlang.
HPC (D) chuan SHC a lo pianchhuah theihna atan khawvel hmuntina Hmar chhulchhuak zawng zawngten mahni theihna zawn
ṭheuhah hma an lak thu tarlangin, "Thi leh thau, nunna tam tak chanin thisen luanna ramah a chang a, fahrah leh hmeithai tamtak a siam phah. Pasalṭhaten kawng bumboh, ruam leh chhuk chho hrut velin, thosi leh vangvat karah, rilṭam tuihal ṭam chhawl nasa tak tuarin, jail runthim leh sipai kutthakte an tuar a ni," an ti.
HPC (D) chuan kum 35 hial thisen luanna ram SHC chu a parvula, rah a chhuahna tur chu a chhunga chengte chungah a innghat tak zet tih tarlangin, "A enkawl leh cheibawl kan thiam loh chuan, kan ṭah hla zawng zawng kha ṭhangthar rawn ni zel tur te tan an ṭah hla a la rawn ni zel ang tih hi a hlauhawm tak zet," a ti a, SHC pianna tur atana an tawrhnate theihnghilh lo turin Hmar mipuite an chah.
SHC inthlan lo awm tur chuan an hmalam hun a hril tur tarlangin HPC (D) chuan, "Zalenna kawl eng mek hi hmang thiam a, tangka sum leh inbumna bawlhhlawh hnawl ngamin, hnam hmangaihna rilru diktak pu ṭheuh turin kan in ngen mawlh mawlh a ni. A tawp berah chuan, SHC election kan hmachhawn mek hi boruak muanawm tak leh zalen taka, kan chanvo adult franchise hmang ṭheuh turin mipuite kan ngen nawn leh a ni," an ti.