Lawngtlaiah sik leh sa inthlak danglam chungchang inzirtirna hun buatsaih

Mizoram Science, Technology & Innovation Council (MISTIC) hnuaia State Climate Change Cell leh Lawngtlai DC office ṭang kawp bul tumin October 11, Zirtawpni khan Lawngtlai DC conference hall-ah Mizorama sik leh sa inthlak danglam chho zelin nghawng a neihte leh science thiamna hmanga a do let dan tur inzirtirna, 'Awareness Programme on the Science of Climate Change in Mizoram' buatsaih a ni a, Lawngtlai DC Shashanka Ala chuan 

a hmanpui.

Shashanka Ala chuan sik leh sa dang­lam (climate change) chu a taka thil thleng, khawvelin a buaipui nasat em em a nih thu sawiin, "Theih tawpa do let a nih loh chuan harsatna lian zawk kan la tawk chho zel dawn a, do let turin mipui kan ṭan rual a pawimawh a ni," a ti. 

MISTIC member secretary Dr RK Lallianthanga pawhin thu sawiin, "Climate change do let turin science thiam­na chu a taka hman a ngai a, a bikin thingtlanga lo nei leh huan siama ei zawngte'n an hman theih tur kawng dap chhuah a ṭul," a ti a, sorkar, mipui leh zirlaite'n mahni zawn ṭheuha hma lak a pawimawh thu a sawi.

MISTIC-a project scientist H Laldinpuii leh scientist-B Lalthanpuiate'n science thiamna hmanga climate change do let a nih theih nana hma lak dan tur leh thil pawimawhte an sawi a, sawihona hun hmanzui a ni.