Tunlai ṭhalai tam tak rilru luahtu

Tunlai ṭhalaite mai bakah nu leh pate pawhin an thlalak leh video-te midang hmuh theih tura an chhawpchhuahna social networking service lar tak Instagram hi October 6, 2010 khan iOS tan tlangzarh a ni.

Facebook ta tho niin, a siamchhuaktu tak chu Kevin Systrom leh Mike Krieger-te an ni a, developer erawh Facebook tho hi an ni thung. San Francisco-ah Kevin-te ṭhiandun hian an siam chhuak. iOS tana tlangzarh a nih hnu lawk aṭang hian a hit nghal hle a, kum khat leh a chanve hnu, April 2012 khan Android version tihchhuah ve leh a ni a, hei hian nasa takin hmangtu a tipung a ni. Windows 10 Mobile tana hman theih turin April 2016 khan siam leh niin, October 2016 aṭang khan Windows 10 tana hman theih tura siam a ni leh bawk.

Instagram hi tunlaiin kan hmang nasa tlang hle a, Zoram ṭhalai tam ber zingah hi chuan engtia hman tur nge, eng nge a tih theih tih chu sawinawn ngai pawh a ni lo ang. Kan thlalak leh video upload-te a filter theih bakah awlsam taka a edit theihna hi hman tinuamtu a ni.

Kumin January thla thleng khan nitin mi maktaduai 500 vel zet chuan Instagram-ah hian story an update a, April thla thleng khan active taka hmang mi tluklehdingawn khat zet an awm tawh.

Instagram hi a lar chak rem rem hle a, tlangzarh a nih aṭanga thla hnih hnu lekah mi maktaduai chuang account nei an awm hman a, kum khat hnuah chuan maktaduai 10 chuangin account an siam hman bawk. April 2012 khan Facebook chuan $tld 1 velin IG hi a lei a, October 2015 thleng khan thlalak tluklehdingawn 40 chuang upload hman a ni.

IG-a thlalak post-tu hmasa ber chu Mike Krieger hi niin, July 16, 2010 khan South Beach Harbor thlalak a post a ni. Hemi hnu lawk hian Kevin pawh hian thlalak a post zui ve leh bawk.

Cristiano Ronaldo chuan IG-ah hian follower a ngah ber a, tunah hian maktaduai 185 chuang follwer a nei a, hmeichhe zinga follwer ngah ber chu Ariana Grande niin mi maktaduai 165 chuangin an follow.

Kumin January 4, 2019 khan @world_record_egg account chuan artui thlalak a post a,  January 14 khan he thlalak hi IG-a thlalak like tu tam ber a ni der a, tun thleng hian mi maktaduai 53 chuangin an like tawh! February thla khan @world_record_egg account neitu hi Chris Godfrey account a ni tih hriatchhuah a ni bawk.

Instagram hi thil atchilh theih tak a ni a, chutih rualin ṭangkai taka hman theih a ni thung. Khawthlang milarte chuan sum tak tak hailuhna atan an hmang a, an vawikhat thlalak post-ah ringawt pawh sum eng emaw zat an lalut 

ṭhin. Tunah chuan milar tehna hmanraw pawimawh tak pakhat a ni tawh a, Mizo zingah pawh follower ngah tak tak an tam bakah, sum lakluhna hmanrua atana hmang pawh an awm ve tawh bawk a ni. A ṭhatna leh ṭhat lohna tam tak a awm a, heng zawng zawngah hian a ṭha zawnga hman zir zel erawh kan tih tur a ni thung.