Sairang-Kawnpui kawng siam loh chuan MTOA-in an truck-te an tlântir dawn lo

Mizoram Truck Owners' Association (MTOA) chuan nimin khan chief minister Zoramthanga hmuin, lehkha an thehlut a; NH-54 Kawnpui leh Sairang inkar kawngpui chu October 16, 2019 hmaa siam a nih loh chuan October 17 aṭangin truck-te an tlântír tawh dawn loh thu an thlen. Chief Minister chuan, chak taka hna thawh a nih tur thu a lo hrilh.

Chief Minister chuan, Kawn­pui leh Sairang inkar kawng chhia chu an hriat thu sawiin, "Ruah a tlak ngun avangin a buaithlak a ni. Engineer-in-Chief pawh ka hrilh a, Inrinni khan SE a hmunah a tír a ni. Tukinah pawh E-in-C ka phone leh a, theihtawpa ṭan la turin ka hrilh," a ti a; kawng siamna atan sum a awm thu a sawi.

Tunah chuan temporary measure (harsatna zualpui phuhrûkna) atan kal harsat zualna laite lunga hnawh chu an tih mai theih a nih thu sawiin Zoramthanga chuan, "Ṭhálah chuan kan siam thei tura ngai ila," a ti.

MTOA hruaitute hi Chief Minister chuan PWD E-in-C hmu ve turin thu a ràwn a; MTOA lam erawh chuan, an hmuh ngun tawh thu leh awmzia a awm loh thuin an chháng. MTOA hruaitute chuan, kawng ṭha an beisei lo a, tlân theih tura siam chu an duh a nih thu Chief Minister an hrilh.

Chief Minister an hmuh zawha thuthar thehdarhtute zawhna chhangin MTOA presi­dent Zodinpuia Zote chuan, Chief Minister-in chak taka hna thawh a nih tur thu a lo hrilh tih sawiin, "Mahse, kawng siam a nih dan kan ngaichâng reng dawn a, kan huntiam chhunga hna thawh a nih loh chuan October 17, 2019 aṭang chuan truck-te kan dintir tho ang," an ti.

Zodinpuia Zote chuan, kawng chhiat avangin mipui mamawh pawh an phuhrûk theih loh thu sawiin, "Ni tin zan tin motor tlu a awm reng a, driver tan pawh a him lo. Phai lam aṭanga bungraw lâk luhna ber a nih avangin Mizoram pumin a tuar thei a ni," a ti a; truck dintir an tum chu Cachar lama truck neitute pawhin thlàwp an tum thu a sawi.

MTOA President chuan, truck-te dintir a nih pawhin mipuite hriatthiamna an ngen lâwk thu sawiin, "Kawng ṭha kan duh vanga kan hmalakna min thlâwp turin mipui kan ngen a ni," a ti.

MTOA-in Chief Minister hnena nimina an lehkha thehluhah chuan, Mizoram Truck Drivers' Association (MTDA)-te nen Sairang leh Kawnpui inkar kawng chhe chung­chang chu October 14, 2019 khan an ngaihtuah thu an tarlang a, "October 16 thlenga kutthlak a awm loh chuan a tûk (October 17) aṭangin he lai kawngah hian kan tlân ngam tawh dawn lo," an ti a; Mizoramin ni tin mamawh leh eibarah harsatna a tawh pawhin mawh an phurh loh tur thu an tarlang.

Sairang-Kawnpui inkar NH-54 kawngpui chhiat chungchang hi vawi tam tak Mizoram PWD-ah an thlen tawh ṭhin thu sawiin MTOA hruaitute chuan, "Tun sorkar tharah pawh Chief Minister hnenah kan thlen tawh. Tunah hian a chhe satliah pawh a ni tawh lo a, truck rit phur a tlu tawp tawp mai a ni. Kan motor a chhiat nasat bakah a khalhtu mihring nunna atan pawh a hlauhawm tâk avangin tlân ngamna chi-ah kan ngai ta lo a ni," an ti.

MTOA hruaitute chuan, NH-54 kawngpui chu siam zawh aṭanga kum eng emaw ti chhung contractor-in a enkawl zui tur nia an hriat thu sawiin, "He defect liability period chhung hian contractor hian kut a thlâk lo niin kan hria a, a security dah pawh kawng chhe siam nan hman a ni lo bawkin kan hria," an ti a; an hriat dan chu a dik a nih chuan, a theih anga ranga hma laksak turin sorkar an ngen a ni.