Ramri venhim hnaah sorkar a inthlahdah hle - Dr Vanlalthlana
Dr Vanlalthlana, MLA chuan nimin khan Aizawl Press Club-ah thuthar thehdarhtute a kâwm a; October 8, 2019 khan Bairabi-ah an kal thu sawiin, "Mizoram sorkar hi kan ram venhimna kawng hrang hranga a inthlahdahzia kan hmu nual a ni," a ti.
Dr Vanlalthlana chuan, Bairabi-ah inner line permit (ILP) pek chhuah dan an en thu sawiin, "Bairabi bikah temporary ILP kan sorkarin a pek chhuah dan hi a him lo hle. Kawngpui dunga motor-a Mizoram lo lut tur tan bik deuh chauha siam Bairabi tawn tirhah temporary ILP awlsam taka siam theihna turin gate a awm," a ti a, temporary ILP siam turin Mizoram sorkarin mimal a rawih thu a sawi.
Sorkarin mimal a rawih chuan temporary ILP a siam aṭangin hlawh a neih thu sawiin Dr Vanlalthlana chuan, "A siam tam leh a hlawh a tam a ni mai. Bairabi-a temporary ILP siamtute hian October 2, 2019 aṭang khan kháwl a chhiat thu an sawi a, Bairabi khuaa mi, a hre chiang deuhte chuan chu aia rei fê khawl an hman tawh loh thu an sawi thung," a ti.
Dr Vanlalthlana sawi danin, sorkarin barcode nei veka temporary ILP an pek chhuah tawh thu an sawi ṭhin laiin, Bairabi-ah chuan barcode neia dilna thehlut an kal laiin an awm lo tih an finfiah. Temporary ILP pek chhuah dan chu a him lo hle a, a siamtute chu an sual duh chuan temporary ILP form barcode nei lo an duh zat zat an tipung (photocopy) thei dawn a ni.
Bairabi-a temporary ILP siamna bul lawk, metre 10 vel leka hláah September 2019 aṭangin Mizoram sorkarin NRC checkgate a dah chauh a, chutah chuan Assam leh India ram hmun dang aṭanga NRC list-a tel lo vawi tam tak an lo ûm lêt (pushback) ṭhin thu, gate duty IR police-te chuan an lo hrilh. September 2019 hmaa NRC nei lo, Bairabi kaltlanga Mizorama lut zat chhût theih a ni lo.
Dr Vanlalthlana chuan, ILP nei thlap, NRC list-a tel si lo tam tak Mizoram chhungah an awm ang tih rinhlelh rual loha a chian thu sawiin, "NRC list-a awm inti, form kengte lehkha ken chu a lem nge a tak tih hre turin Bairabi gate-ah enfiahna tur khawl leh bungrua a awm lo a, internet connection pawh an nei lo. NRC list an kawl lo bawk," a ti.
Maxicab ruak, hnam dang driver khalh vawi tam tak Mizoram lam pana an tlân luh ṭhin thu duty-te'n an hrilh tih sawiin Vanlalthlana chuan, "NRC checkgate, temporary ILP gate leh Bairabi police checkgate pathumte hi kêin awlsam taka hêl theih vek a ni," a ti a; Bairabi rél chawlhhmunah temporary ILP, ILP leh NRC certificate endikna a awm loh thu a sawi.
Dr Vanlalthlana chuan, Bairabi-ah police dah belh a ngaih thu sawiin, "Bairabi-ah hian ramri venghim turin 1st IR company khat dah a ni a, company pakhatah mi 30 vel awm tur an nih laiin, mi 17 chauh dah an ni. A nihna tur ang taka dah turin chenna tur hmun a awm lo thung.
Congress ministry lai, kum 2013 vela sak building pakhat, mi 20 vel awm theihna chu sak zawh phat aṭangin luah ngam loh khawpin a sak dan a chhiain a hlauhawm a ni," a ti.