MR-a thawk tur zirtirtu lak hna zo

Mizoram sorkarin pri­mary leh middle school-a muster roll (MR)-a thawk tur zirtirtu 881 a lakna chu zawhfel a ni. Zirtirtu atana lâk tharte'n hun eng emaw chen engagement card an hmuh loh hnuah, zirtirtu lak hna zawh a ni a, vawiin aṭangin a tlingte chuan SDEO hnen aṭang­in engagement card lak theih a ni.

Tarlan tawh angin, MR-a thawk tur zirtirtu 881 laknaa tlingte hming chu September 20, 2019 khan School Education department website-ah tihchhuah a ni. MNF treasurer Vanlal­zawma chuan September 23 khan Mizo Hnam Rûna thu a sawinaah, Chief Minister nen an in­biaknaah, 'Zir­tirtu MR lak result tihchhuah chungchangah, School Education Minister chu phai lama a zin a lo haw mek a, a lo haw hunah thil fel tâwk lo leh siamṭhat ngai chu a ṭul angin hma kan la ang,' tiin a puang a ni.

Hun eng emaw chen chinfel hna thawh a nih hnuah, School Education department-a Deputy Director (Administration) chuan hriattirna ti­chhuak­in, zirtirtu atana tlingte hnenah October 15 aṭangin engagement card pek a nih theihna atan SDEO-te chu October 14 hmaa engagement card, directorate-ah lam turin a hriattir a ni.

MR zirtirtu atana lak tharte chu an bialtu SDEO hnenah ṭheuh vawiin aṭanga engagement order lam tura hriattir ve leh an ni bawk. Vanglaini palai zawhna chhangin School Education Minister chuan, uluk takin MR zir­tirtu lakah fel lo a awm leh awm loh enfiah a nih thu a lo sawi tawh a, "Hmun hrang hrang aṭanga fel lo nia sawi awmte uluk taka enfiah a ni. A tling leh thiamte'n hna an hmuh ngei hi sorkar duh dan a ni a, chu vang chuan enfel hna thawh a ni," a ti.