KHAWTHLIR

Mizoram Information Commission (MIC) buatsaihin nimin khan Saitual Auditorium-ah Right to Information (RTI) Week pualin hun hman a ni a, information commissioner Zorammawia'n a hmanpui. Zorammawia chuan, RTI Act chung­chang, a kalphung leh hman dante a sawifiah a, mipuiin RTI Act an hman ṭangkai a pawimawh thu a sawi. Inkhawmah hian Saitual DC Lalpeksanga leh SP PC Lalduhthlanga te bakah, Saituala high school chin chung lama zirlai leh zirtirtu te, V/C leh NGO hruaitute an tel a ni.

Private airline lârte zinga mi, GoAir chu vawiin aṭangin Aizawl (Lengpui Airport) leh Guwahati inkarah a thlâwk ṭan dawn. Mizorama GoAir thlâwk ṭan tur hi tukin hian chief minister Zoramthanga'n Lengpui Airport aṭangin a vailiam ang. GoAir thlawhtheih­na chu zing dar 6:50-ah Guwahati aṭanga thlâwk chhuakin, zing dar 7:50-ah Lengpui Airport a thleng ang a; Lengpui aṭangin zing dar 8:40-ah Guwahati panin a thlâwk chhuak leh ṭhin dawn a ni.

October 13, Pathian­ni chhun dar 1 vel khan Tuikum lui kama Lalnunsanga, Serchhip P&E Veng sangha dil chu Lalremtluanga (33) s/o Lalbiakthanga (L), New Serchhip North leh Joseph Lalthanpuia S/o Biakhmingthanga, New Serchhip Venglai nia insawite'n jeletine hmang­in an bomb a, sangha dil neitute'n nangchingin, police an hriattir a, police-in an man. Mi pahnihte hi Pathianni vêk khan District Court-ah hruai niin, Court thu angin Serchhip District Jail-ah dah an ni.

ZPM chuan nimin khan an pisaah inkhawm an nei a, Prof. Thang­chungnunga'n thu sawiin, "Kan ram hruaitute'n an sawi uar ber chu kut hnathawktute ngaihsak leh eibara intodelh a ni a, a sawi uar deuhte phei chuan kum thum chhung­a intodelh leh Switzerland of the East-te min tiam a ni. NLUP, MIP, SEDP-te an tih dan kan hmu tawh a, hlawh­tlinna hmuh tur a awm mang lo," a ti. Mizoram ram rualawh a nat thu sawiin, ram/state dangin hlawh­tlinna an neihte chu ram hruaitu ṭha an neih vang a ni tih hre turin mipui a chah a ni.