Thupek sût turin Speaker kan ngen - Lalduhoma

15th October, 2019

ZPM Legislature Party (ZLP) a din laia an leader Lalduhoma chuan, Assembly speaker Lalrinliana Sailo chu ZLP ṭhiat tura a thupek sût leh turin an ngen tih a sawi.

Lalduhoma chuan, ZPM-in Parliament leh Assembly kalphung humhalh tlat an duh thu sawiin, "Independent MLA mahni thua ding leh party base MLA-te chu thuhmun anga hrût rual chi a ni lo. A thutlukna lo siam tawh sût leh turin October 7, 2019 khan Speaker kan ngen. Kan ngennaah hian kan ṭan chhante kan thil tel a, Speaker hian thutlukna a la siam lo," a ti.

October 5, 2019-a Union Home minister Amit Shah leh tlawmngai pawl hruaitute an inkawm ṭumin, Amit Shah chuan Mizote a hmusit hle nia sawiin Lalduhoma chuan, "Citizenship Amendment Bill-ah hian ILP zeh luh a ni ang, a ti niin kan lo hria a. Eng tin nge CAB-ah hian ILP hi an zeh luh ang tih hi kan zawhna a ni," a ti a; CAB chu Hindu leh Buddhist ni lo, foreigner-te danna tur a nih laiin, ILP chu foreigner-te danna ni loin, Indian khua leh tui, tribal ni ve lote danna a nih thu a sawi.

Lalduhoma chuan, Chakma-te chu tribal ve tho an nih avangin ILP-in a dang ve thei lo tih sawiin,"CAB hi pass a nih a, Mizoramah pawh hman a nih chuan Chakma (Hindu/Buddist)-te chu tribal-foreigner an ni dawn a, Indian citizen zinga non-tribal danna ILP hian a dang thei dawn lo. Union Home Minister-in kan NGO-te thu a tiam hi min hmuhsitzia tilangtu a ni," a ti.

Union Home Minister-in Mizo hlang awmna CRPF siam chungchang a sawi chu awih har an tih thu sawiin Lalduhoma chuan, "Recruitment Rules for Central Military Forces a awm a, chu chuan hnam bil battalion din a phal lo," a ti a; dan pèla BJP sorkar chu an chêt a rin loh thu a sawi.

Lalduhoma chuan CAB leh CRPF-in inzawmna a nei lo tih sawiin, "CRPF-te chu tualchhung buainaa duty tur an ni a, ramria duty tur chu a hran an awm. Chuvang chuan, CAB pass a nih pawhin, Mizo CRPF chu foreigner lo lut tur dang tur a duty tur an ni lo. Mizoram tan bika eng emaw ruahmanna siam a nih loh chuan CAB chu Mizote tan a hlauhawm ngaiin a la hlauhawm reng a ni," a ti.