Kawngpui ngaihtuah bik anga insawi hi Mipui zahlohna a ni - ADCC

Aizawl District Congress Committee (ADCC) hruaitute nimina an president Vanlalzuiliana hoa ṭhukhawm chuan thuchhuah siamin, MNF hotute'n MNF kaihhruai sorkar chu kawngpui ngaihtuah bik sorkar anga Assembly House-a an sawi chu Assembly House leh mipui zahlohna lian taka an ngaih thu an tarlang.

ADCC chuan, tunlaiin Mizorama kawngpui chhiat thu mipuiin an inhrilh mek tih sawiin, "Assembly House-ah, sorkar tûk maia thla 4/5 chhung leka Congress sorkar sum hman bân hmangin Zoram dung leh vângah kawngpui siam nghal a ni tih a sawi mai hi a nuihzatthlak lo a, mipui tan a thinrimthlak hle zawk. Kawngpui ngaihtuah bik sorkar anga House-ah an insawi duh hi House leh mipui zahlohna lian tak a ni," a ti.

ADCC chuan, Lalhriatrenga Chhangte-in court-a a khinnaah MPCC president Lal Thanhawla'n thiam a chang chu lawmawm an tih thu an tarlang a; Serampore College (University)-in Lal Thanhawla hnena Doctor of Divinity (DD) hlan an tum chu lawmawm an tih thu leh an chhuah thu an tarlang bawk.