Aizawlah Palliative Care Day hman a ni

Programme for Palliative Care (NPPC) chuan nimin khan Taxation Auditorium-ah World Hospice & Palliative Care Day an hmang a, Health & Family Welfare Board vice chairman Dr ZR Thiamsanga, MLA-in a hmanpui.

Programme for Palliative Care hi cancer natna leh natna benvawn leh khirhkhàn zual, dam beiseiawm tawh lote'n an hun hnuhnung lama na hrehawm tak an tawrh­ lohna tura enkawlna prog­ramme a ni. World Hospice & Palliative Care Day pual inkhawm hi NHM mission director Dr Eri'n a kaihruai a; NPPC-a state nodal officer Dr Jeremy L Pautu-in NPPC chung­chang a sawifiah.

Khuallian Dr ZR Thiam­­sanga chuan, palliative care pawimawhnain hriat a la hlawh lutuk loh avangin sorkarin nasa leh zuala ṭan lak a tum thu a sawi a, "Kum thar aṭang chuan state pumah changtlung zawka kan kalpui theih i beisei ang u. Hemi kawnga tha thawh ngaihna apiangah Mizoram sorkar chu a inhawng reng a ni," a ti.

Dr Jeremy L Pautu tarlan danin, khawvel pumah palliative care pek ngai mi nuai 200 an awm a, third world country (developing country) hoah an tam zual. Mizoramah chuan NPPC hi kum 2016-ah hman ṭan a ni a, Health department district paruk - Aizawl East, Aizawl West, Champhai, Kolasib, Mamit leh Lunglei district-ahte hman a ni tawh.

NPPC hian OPD service leh damdawi-ina awm damlote an enkawl thei a, thawktute'n damlote chu an in lamah kal chilhin, a ṭul angin morphine leh enkawlna dangte an pe ṭhin bawk. NPPC hmanga enkawlna dawng tur chuan Mizoram State Cancer Institute-ah an inziah luh phawt a ngai a ni.