Mizoram District Gazetteers Aizawl tlangzarh

Art & Culture minister R Lalzirliana chuan nimin khan Art & Culture department hnuaia Tribal Research Institute buatsaih, Mizoram District Gazetteers Aizawl tih lehkhabu chu a pisaah a tlangzarh.

R Lalzirliana chuan, District Gazetteer hmasa chhuah lai, kum 1989 leh tunlai hun tehkhinin, hun a inher danglam nasa tawh tih sawiin, "Kawng hrang hrangah hma kan sawn a, heng hmasawnna chanchin ziahna bu kum tam tak hnua buatsaih a ni leh thei chu a lawmawm a, lehkhabu rotling a ni. Nakin zelah Mizoram leh Mizote chanchin ziahna kawngah mithiamte'n an ṭangkaipui dawn a ni," a ti.

Art & Culture chu department lian lo ni mah se, a pawimawh thu sawiin R Lalzirliana chuan, "Mizote mahni hnam ziaráng ngaihhlutna leh chawisan zelna kawng­ah hna pawimawh tak a thawk a, Mizo ṭhalaite'n nationalism an hriat zelna atan pawh a ṭangkai thei hle a ni," a ti a; hnam ziarángte chu tunlai mila tihdanglam ṭha a tih loh thu leh chutiang chu a hlutna tibo thei a nih thu a sawi.

District Gazetteer hi British hun laiin British hoin district chanchin hrang hrang ziaka an dah khawmna bu a ni ṭhin. Kum 1989 khan Art & Culture department-in Mizoram District Gazetteer a lo buatsaih tawh a, nimina an tlangzarh tak hi kum 1989 hnua Gazetteer bu buatsaih leh hmasak ber a ni. Lehkhabu hi phek 575-a chhah a ni a, Rs. 400 man a ni.