Vigilance hnuaia Lokayukta dah duh lo

PRISM party chuan thuchhuah siamin, Mizoram sorkarin Vigilance department hnuaia Lokayukta a dah chu pawi an tih thu an tarlang a, Mizoram sorkar chu corruption vengtu tur tiṭhuan­awp zawnga hma la-ah an puh.

PRISM thuchhuah chuan, "Kan ram leh hnam tana ṭha tur leh mipui tam zawkin kan duh anga Lokayukta hi mahni kea ding a, sorkar thunun phak loha corruption veng thei tura a dinhmun ngaia dah lêt leh thuai turin sorkar kan ngen a ni," a ti.

Nimin khan PRISM chuan an pisaah Lokayukta chungchang sawihona hun an hmang a; an president Vanlalruata chuan, sorkarin corruption veng tur department a neih Vigilance chu ram hruaitu leh sorkara thuneitute'n an thunun theih avangin awmzia an nei tâwk lo tih a sawi a; mipuiin nasa taka an nawr hnuah Central-ah Lokpal leh state-ah Lokayukta din a ni tih sawiin, "MNF sorkarin kum pawh a vei hma, hna an thawk ṭan dawn leih leih chauh a, sorkarin Lokayukta tiṭhuanawp tura hma a la a, Vigilance hnuaia a dah hi corruption kawngkhâr hawng zau zawnga ke a pên avangin kan dem tak zet a ni," a ti.