EPIL-in hna an la zawh loh avangin AR an la insawn thei lo - Home department
Home department aṭanga thu dawn danin, Aizawl khawpui lailía awm Assam Rifles-te insawn chhuahna tur hmun Zokhawsanga hna thawktu Engineering Projects India Ltd. (EPIL)-te'n hna an la thawh zawh loh avangin AR-te insawn chhuah hun tur hriat theih a ni lo.
Home department hotute'n Vanglaini an hrilh danin, EPIL hi an hna thawk zo thuai thuai tura tih an ni chungin an la thawk zo thei lo. AR insawn chhuah chungchang hi Ministry of Home Affairs (MHA)-ah thlen leh tawh a ni a, mahse, Home department chuan chhanna an la dawng lo. AR lam chuan, an hmunhma tur peih a nih veleh an insawn theih thu Home department hotute an hrilh.
August 1, 2019 khan Home department hotute an kawm ṭumin EPIL hotute chuan, an hnathawh tur an zo thawkhat tawh nia an sawi thu Vanglaini an lo hrilh tawh thung. Tarlan tawh angin, MHA chuan February 19, 2019 khan office memorandum tichhuakin, Aizawla Assam Rifles battalion headquarters (Lammual leh a chhehvel) chu May 31, 2019 hmain an hmun thar, Zokhawsang, Zemabawkah insawn tura tih a nih thu a tarlang.
MHA tarlan danin, MHA Additional Secretary (Police) kaihhruaina hnuaia February 7, 2019 meeting thuchhuak angin, Aizawla AR-te chu Zokhawsanga insawn tura tih an ni. Assam Rifles sipai eng emaw zat chu Zokhawsangah hun eng emaw chen an awm tawh a, an zavaia insawn tur chuan Mizoram sorkar leh EPIL-te'n an tih tur an tih zawh phawt a ngai. Home department hotute chuan, Mizoram sorkarin a tih tur ang chu an ti zo tawh niin an sawi.