Aizawlah GoAir a thlâwk ṭan

GoAir chu nimin aṭang khan Aizawl (Lengpui)-ah a thlâwk ṭan a, Aizawl-Guwahati inkara GoAir thlawhtheihna thlâwk hmasa ber chu nimin zing khan Lengpui Airport-ah chief minister Zoramthanga'n a vailiam. Mizorama thlawk ṭan ta GoAir thlawhtheihna hi Airbus 320 a ni a, February 10, 2019-a Jet Airways-in Mizoram leh India hmarchhak state danga service an tihtawp hnua Mizoram leh Guwahati inkara thlawhna thlâwk leh hmasa ber a ni. Nimin aṭanga October 26 thleng chu Guwahati leh Aizawl inkarah bik chauh a thlawk dawn a, October 27, 2019 aṭangin Aizawl-Kolkata service pawh a awm ang.

GoAir hi Aizawl-Guwahati inkar bika a thlawh chhung, October 26 thlenga a thlawh dan tur chu - zing dar 6:50-ah Guwahati aṭangin Aizawl a pan dawn a, darkar khat velah Lengpui Airport-ah a ṭum ang. Zing dar 8:40-ah Lengpui Airport aṭangin Guwahati panin a thlawk chhuak leh dawn a, chawhma dar 9:50-ah Guwahati a thleng dawn a ni.

October 27, 2019 aṭangin Kolkata-Aizawl service a awm ṭan dawn a; chawhma dar 10-ah Kolkata aṭanga thlawk chhuakin, dar 10:55-ah Lengpui a thleng ang. Aizawl aṭangin Guwahati panin chhun dar 11:25-ah a chhuak ṭhin dawn a, Guwahati aṭangin chawhnu dar 1:15-ah Aizawl panin a thlawk chhuak leh ang a; Aizawl aṭangin chawhnu dar 3:05-ah Kolkata panin a thlawk chhuak leh ṭhin ang.

GoAir hi airline man tláwm, Wadia Group ta a ni a, November 2005 aṭangin airline operation an ṭan a, ni tin flight 325 an nei ṭhin. Aizawl hi India rama thlawhna service an neihna khawpui 25-na a ni. GoAir flight service ṭanna puala Lengpui Airport-a inkhawmah Chief Minister chuan, hun rei tak Mizoram mipuiin an nghah hnua Aizawl leh Guwahati inkarah thlawhna a awm leh ta chu lawm­awm a tih thu sawiin, thlawhna chu damlo inenkawl tum te, zirna leh hna thil vanga zin ngaite tan a pawimawh thu a sawi. 

CM Zoramthanga chuan, GoAir bakah flight service dangte pawh Mizoramah a awm belh zel a beisei thu a sawi a; thlawh­theihna tam zawk an thlawh theih nan Lengpui Airport chu kawng hrang hranga thuam ṭhat hna thawh mek a nih thu a sawi bawk.

Airport Authority of India (AAI) regional executive director Sanjeev Jindal chuan, Aizawl leh Guwahati inkara flight service siam chu sum lama hlâwkna ngawr ngawr aiin, mipui mamawh phuhrûk tumna a nih zawk thu a sawi. GoAir vice president Harjinder Singh Bhasin pawhin, an thlawhtheihna Mizorama thlawk thar chuan khualzinte tan hmasawnna kawngah rah ṭha a chhuah a beisei thu a sawi bawk.

Inkhawm hi chief secretary Lalnunmawia Chuaungo-in a kaihruai a, GAD secretary Ashish Kundra-a'n lawmthu a sawi. Mizoram DGP SBK Singh, Aviation principal consultant Wg.Cdr. J Lal­hmingliana, Mizoram sorkar leh AAI hotu dang­te pawh an tel a ni.