PWD-in kawngpui chhia an sawifiah

Mizoram PWD chuan thuchhuah siamin, NH-54 kawngpui, Kawnpui-Khamrang-Buichali kawng chhia chungchang an sawifiah a; khuarèl chhiatna (leimin) vanga an buai avangin tuna NH-54 kawngpui chhe zual laite chu an khawih hman mai loh thu leh, tunah chuan kawng chhia thawm ṭhat hna an thawh ṭan tawh thu an tarlang.

PWD tarlan danin, Kawnpui-Khamrang-Buichali kawng kum 2014-a siam zawh tawh chu resurfacing hna thawk turin March 12, 2018-ah sanction a ni a, tender chhuah nghal a ni. Selection approved hun Ministry-in an lak rei avangin re-tender (tender chhuah nawn) a ni a, chumi chhunga tender document thar EPC mode-a thlak a nih avangin February 28, 2019-ah tender ṭhat leh a ni.

Work order pe turin sanction nun hun (Ministry-in a tihnun hun) an nghak mek a; sorkar ṭhahnemngaihnain sum a pek aṭangin fûr hmasaah a khuar chhe zual lai concrete pavement a siam a ni a, patch repair pawh thawh a ni.

PWD chuan, Tuitunah kumin June thlaah leimin avangin kawng a ping a, Huanmawi bulah July 2019-a nasa taka leiminin kawng a hnawh bawk tih an tarlang a, "Kawng enkawltute'n leimin buaipui rêng rêngin hun an hmang a. He kawng pawimawh tak hi leimin buaipui hautak deuh deuh June leh July thlaah a awm avangin road surface repair hna hi a hun takah thawh hman loh deuh a nih avangin pot-hole hmun eng emaw zatah a lo awm hman a ni," an ti.

Leiminin kawngpui a hnawhte chu thenfai a nih tawh avangin, leimin an buaipui vanga an ngaihsak hman loh chhunga kawng khuar thûk tak takte chu thawm ṭhat hna ngawrh taka thawh ṭan a ni tih sawiin PWD chuan, "Khuarte hi ngawrh taka hnawh mek a ni a, khuain a zir chuan kar hnih chhung vel chuan a chhe zualpui zawh hman beisei a ni," an ti a; khuarel chhiatna vanga harsatnate chu mipuiin an hriatthiampui an beisei thu an tarlang bawk.